Kompañia Holpilat harii riin eletrisidade iha aldeia Holba la kualidade
COVALIMA, 21 fevereiru 2023 (TATOLI)—Xefe aldeia Holba, Raimundo Henriques, preokupa tebes tanba kompañia Holpilat Unipesoál, Lda, harii riin eletrisidade iha aldeia Holba, suku Taroman, postu Administrativu Fatululik, munisípiu Covalima laiha kualidade.
“Ami haree riin eletrisidade iha fatin sira seluk ai-riin eletrisidade hotu-hotu naruk, maibé ami haree ai-riin eletrisidade iha aldeia Holba laiha kualidade hanesan ema soe ida dalan mak hili de’it tanba kle’uk hotu no balun badak,” Raimundo Henriques informa ba Agência Tatoli, liuhosi Telfónika, tersa ne’e.
Alende riin eletrisidade la kualidade, xefe aldeia ne;e mós identifika riin eletrisidade la sufisiénte hodi la kobre mós iha aldeia balun.
“Iha ami-nia aldeia Fatuloro no Holba iha bairru balun riin eletrisidade la to’o. Maske ami autoridade lokál hato’o ba kompañia no to’o haksesuk malu ho tékniku sira maibé sira lakohi rona ami bazea ba ha’u asina ho EDTL nasionál, komunidade hotu-hotu tenke asesu eletrisidade,” nia dehan.
Xefe unidade EDTL, E.P Covalima, Alexandre Seran, klarifika nia parte seidauk husu informasaun ne’ebé klaru kona-ba preokupasaun hosi xefe aldeia Holba.
“Ai-riin eletrisidade ne’ebé sira-harii, ha’u husu informasaun maibé seidauk klaru. Razaun ai-riin eletrisidade mak la hanesan ka harii ai-riin mak la tuir sira-nia dezeñu mak sei haruka kompañia sira hasai fali,” nia dehan.
Tanba, tuir nia, servisu tenke la’o tuir dezeñu ne’ebé iha la’ós harii ohin maibé aban sobu bainrua sobu fali, entaun ida-ne’e signifika servisu la kualidade no sei la tolera.
Iha suku Taroman aldeia Holba, Kompañia Holpilat mak oras ne’e daudaun halo hela servisu, antes ne’e EDTL, E.P hala’o observasaun katak kompañia sira hala’o servisu hodi tesi ai atu harii riin eletrisidade.
Suku Taroman, postu administrativu Fatululik ho nia aldeia sira hanesan Taroman, Lianain ne’ebé asesu ona eletrisidade, aldeia Makous, Holba no Fatuloro seidauk asesu eletrisidade ne’ebé daudaun ne’e kompañia harii ona riin eletrisidade.
Jornalista : Celestina Teles
Editór : Cancio Ximenes
