DILI, 21 fevereiru 2023 (TATOLI)— Institutu Apoiu Dezenvolvimentu Emprezariál (IADE) hamutuk ho Ministru Koordenadór Asuntu Ekonómiku (MKAE), Joaquim Amaral no Vise Ministru Turizmu Indústria, Domingos Lopes Antunes halo lansamentu ba kompetisaun Planu Negósiu Inovativu (PNI) ba tinan 2023 iha área pekuária nian.
Ministru MKAE, Joaquim Amaral, hateten kompetisaun negósiu inovativu ba tinan ida ne’e, importante tebes tanba Timor-Leste (TL) foin hakat liu krize boot hanesan COVID-19 no inundasaun entaun PNI ne’e presiza hetan fali talenta foun hosi joven sira atu bele dezenvolve setór ekonómia ne’e.
“Kompetisaun PNI 2023 ne’e ba iha setór pekuáriu nian, importante tebes. Tanba liuhosi PNI ne’e, atu bele konvida ita-nia joven sira atu bele partisipa iha eventu ida ne’e hodi hatudu ita-nia talentu no matenek atu esplora rekursu ne’ebé ita-nia rai iha ona,” Ministru Joaquim Amaral hateten iha serimonia lansamentu ne’ebe halao iha instituisaun IADE, Bebora, Dili, tersa ne’e.
Ministru Joaquim dehan, Governu presiza investe makaas iha PNI. Tanba, Estadu agora iha ona faze ida ne’ebé atu diversifika ekonómia. Signifika atu haree setór produtivu sira ne’ebé iha nasaun ida ne’e. Tanba setór produtivu ne’ebé agora iha pilár ne’ebe importante mak setór turizmu, no agrikultura.
“Ha’u hakarak nafatin enkoraja joven sira atu tinan ida ne’e ita boot sira bele aproveita oportunidade ida ne’e. Tanba, kompetisaun PNI ba 2023 ne’e mós la dook ho ita-nai moris lorloron nian. Ita hotu hatene setór pekuária nu’udar setór ida ne’ebé sei oferese oportunidade boot ba TL,” Joaquim hateten.
Diretór Ezekutivu IADE, Filomeno Marcelino Belo, hateten atividade lansamentu PNI 2023 ho tema “Muda o nia Moris ho negósiu Pekuária”. Lansamentu ne’e importante tebes tanba IADE, hanesan institutu autonomu ida, ne’ebé tutela ba MKAE ho nia papél prinsipál hodi fó apoiu servisu ba asisténsia emprezariál, liuhosi programa formasaun ba kapasitasaun intelektuál no akompañamentu, akonsellamentu emprezariál, hodi promove empreza Mikru Ki’ik Médiu (MKM), iha territóriu Timor laran tomak.
Tanba liuhosi PNI ne’e bele hasa’e kresimentu ekonómiku no aumenta ho dignu no sustentável ba timor-oan, hodi moris armonia, justu, prosperiedade no absoluta.
“Ho razaun ida ne’e, IADE hala’o eventu PNI 2023 ba iha pekuária nian no objetivu prinsipál hosi eventu ne’e, hodi promove setór pekuaria hahú hosi produtór, koletór, prosesamentu no distribuidór to’o merkadu,” Filomeno Marcelino hateten.
Nia dehan, kompetisaun PNI ne’e mós, hodi enkoraza juventude potensial sira iha negósiu setór pekuária, atu bele kontribui ba dezenvolvimentu ekonómiku ne’ebé dignu no sustentavel iha rai doben TL. Kompetisaun ida ne’e, sei la’o ho durasaun ne’ebe naruk ba progresu.
Lansamentu ba kompetisaun Planu Negósiu Inovativu ne’e rasik rejistrasaun sei realiza iha resintu IADE, hahú loron 22 fevereiru to’o remata.
Prosesu selesaun ba kompetisaun ne’e iha etapa ualu (8) mak hahú hosi faze identifikasaun sei iha tarjetu ba partisipante kompostu hosi ema hamutuk 300, inklui munisípiu ho ideia negósiu inovativu durante tinan 2023 nia laran.
“Orsamentu ne’ebé ita prevee ba Planu Negósiu Inovativu 2023 ne’e hamutuk $58.000. Orsamentu ida ne’e maihosi Orsamentu Jerál Estadu (OJE) 2023,” nia hateten.
Jornalista : Arminda Fonseca
Editora : Armandina Moniz
