DILI, 21 fevereiru 2023 (TATOLI) – Sekretáriu Jerál Ministériu Negósiu Estranjeiru no Kooperasaun (MNEK) Francisco Cepeda, dehan iha tinan ne’e, ministériu reativa ona sentru formasaun diplomata ba funsionáriu MNEK hotu.
“Ami agora reativa fali ona sentru diplomata ne’ebé antes ne’e iha, ami reativa ona no disponibiliza formasaun lubuk ida ba diplomata foun sira, agora daudaun la’o hela, hanesan formasaun ba lian inglés tanba ita servisu hamutuk ho Nova Zelandia ho LELI no sei loke mós formasaun seluk ba ita nia diplomata sira”, Francisco dehan ba Agência TATOLI iha edifísiu MNEK, ohin.
Nia hatutan, MNEK halo mós peskiza ida, atu haruka diplomata sira ba tuir formasaun iha diaspora, hanesan Australia, Nova Zelandia no nasaun sira iha ASEAN.
“Antes ne’e, tanba Covid-19, ita nia formasaun ba diplomata sira iha Institutu Diplomata MNEK nian ladún la’o másimu, maibé ita kontinua fali de’it saida mak antes ne’e iha tiha ona, haruka ita nia diplomata sira ba tuir formasaun iha rai-liur”, nia esplika.
Nia revela, formasaun ba diplomata ne’e loke direta ba funsionáriu hotu ne’ebé servisu iha MNEK. Iha formasaun ne’e, formadór sira mai hosi rai-liur, balun diretór sira hosi MNEK no embaixadór balun ne’ebé iha esperiénsia másimu iha diplomata.
“Formadór sira mai hosi rai-liur mak fó formasaun ba ita nia diplomata sira, sira ne’e mesak profesór doutór de’it, nune’e diretór balu iha MNEK no ita nia embaxadór sira balun iha esperiénsia másimu ba diplomata nian”, nia hakotu.
Jornalista:Hortencio Sanchez
Editór : Zezito Silva
