VIQUEQUE, 21 fevereiru 2023 (TATOLI)— Ministériu Obra Públiku (MOP) liuhosi Vise Ministru Obra Públiku (MOP), Nicolau Lino Freitas, koordena ona ho kompañia China Overseas Engineering Group Co, Ltd (COVEC) hodi normaliza estrada ne’ebé kotu iha área Lugatoi, iha postu Viqueque-vila, munisípiu Viqueque.
“MOP ho empreza hahú hala’o koordenasaun atu normaliza estrada iha área Lugatoi ne’ebé besik atu kotu ne’e. Tanba estrada ne’e mak kotu ne’e difikulta ba movimentu ema ho transporte ba postu adiministrativu Uatulari, Uatucarbau, Lacluta no Viqueque Vila. Ho ida-ne’e vise mai fó tan servisu adisionál ba Covec atu resolve estrada refere”, hateten Diretór Serbisu Obra Públiku, Munisípiu Viqueque, Mario do Rego, ba Agência Tatoli iha ninia kna’ar fatin, tersa ne’e.
Ho koordenasaun ne’e, nia afirma ekipa tékniku hosi empreza CRIG-COVEC bá halo negosiasaun ho komunidade sira iha área Lugatoi hodi suru rai-mutin atu aterru iha estrada refere.
“Maibé, ita-nia komunidade sira área Lugatoi maka la aseita oferese rai ba kompañia hodi halo normalizasaun ba dalan Lugatoi, parte laboratóriu nasionál halo ona teste amostra ba rai Lugatoi nian atu uza ba aterru estrada refere ho di’ak”, nia afirma.
Responsavél ne’e afirma empreza presiza mormaliza lais atulabele difikulta movimentu ema no transporte públiku iha loron paskua.
“Empreza sei halo normalizasaun hodi aterru rai-mutin no halo moru protesaun. Ami apoiu mós ai-rin eletrisidade nian-20 ne’ebé sei tula iha postu Uatulari, maka sei uza ba protesaun rai halai hodi satan netik rai nune’e rai labele halai ba mota laran”, nia afirma.
Kona-ba orsamentu normalizasaun, nia dehan, MOP sei uza orsamentu imprestimu hosi Asia Development Bank (ADB) ne’ebé jere husi MOP nasionál.
Reabilitasaun estrada hosi Venilale mai Viqueque responsável hosi empreza China Railway International Group Co Ltd, hamutuk ho China Overseas Engineering Group Co, Ltd, ne’ebé kustu ba infraestrutura ne’e tama ba pakote projetu estrada nasionál hosi munisípiu Baucau bá Viqueque, ho lot rua hanesan Baucau to’o Venilale no Venilale to’o Viqueque ho kustu $23.853.175,70.
Jornalista : Vitorino Lopes da Costa
Editór : Florencio Miranda Ximenes
