DILI, 21 fevereiru 2023 (TATOLI) – Ministra Saúde Odete Maria Freitas Belo, dehan ema barak preokupa rekursu umanu, medikamentu, eletrisidade, bee moos no seluk tan iha postu saúde sira, maibé Ministériu Saúde nafatin fo prioridade ba problema hirak ne’e, atu atendimentu ospitalár bele normál hodi fó saúde di´ak ba povu.
“Ema brak sei preokupa postu saúde nia rekursu umanu, medikamente, ami koko rezolve problema sira ne’e nafatin maibé ita boot sira hatene katak Ministériu Saúde halo ona mudansa boot, espesialmente harii postu saúde sira iha área rurál. maibé problema mak eterisidade seidauk to’o ne’eba inklui bee moos”, Odete Maria Freitas Belo, hateten ba jornalista sira iha JL Villa, ohin.
Nia rekoñese katak postu saúde nafatin sei iha problema maibé responsabilidade Governu nian mak tau nafatin atensaun.
“Ita haree postu saúde sira nafatin sai problema ba públiku maibé ami nafatin tau atensaun ba ida ne’e hodi lori prestasaun servisu saúde ba populasuan tomak”, nia dehan.
Iha 2023, Ministériu Saúde prevee orsamentu hamutuk $65,158,816 hodi hadia prestasaun servisu saúde ba populasaun tomak.
Jornalista : Felicidade Ximenes
Editór : Zezito Silva