DILI, 21 fevereiru 2023 (TATOLI) – Ministra Saúde Odete Maria Freitas Belo, informa iha tinan 2024, Ministériu Saúde sei deklara eleminasaun moras Malaria iha Timor Leste.
“Ita tama iha membru ezekutivu board husi Organizasaun Mundiál Saúde nian iha fulan kotuk iha Zeneva hodi ko’alia kona-ba eliminasaun moras malaria nian, entaun ita hakarak moras ne’e ita tenke elemina iha tinan oin”, Odete Maria Freitas Belo dehan ba jornalista sira iha JL VILLA ohin.
Nia hateten, husi enkontru ezekutivu board ne’ebé halao iha Zeneva, parte husi Organizasaun Mundiál Saúde fó ona kritéria ba Ministériu Saúde atu elemina moras ida ne’e.
“ Iha momentu ne’eba sira fó ona kritéria ida oinsá elimina moras malaria, entaun ita presiza servisu makas ba moras malaria ida ne’e atu bele elemina iha tinan oin”, nia afirma
Nia dehan, bainhira MS deklara elimina moras malaria sei hetan sertifikadu husi Organizasaun Mundiál Saúde katak moras ne’e sei la eziste.
“Bainhira ita deklara eliminsaun malaria ita sei hetan sertifikadu husi OMS tanba ita mós daudaun ne’e tama hela iha ASEAN. Entaun ba futuru ita nia vizitante sira husi rai liur mai la bele auk ona kona-ba moras malaria iha ita nia rain”, nia subliña.
Ministra Saúde husu katak atu elemina moras malaria ne’e presiza ema hotu nia kontribuisaun liuliu iha ambiente nian hodi bele prevene moras ida ne’e iha Timor Leste.
Iha sorin seluk, Diretór Klínika Bairo Pite Inacio dos santos, dehan bainhira atu elemina moras malaria tenke halo esforsu bo’ot hodi bele elemina moras ida ne’e.
“Bainhira ita elemina moras malaria iha ita nia rain, ida ne’e susesu boot ba ita liuliu MS ho nia ekipa sira ita bele elemina ona malaria tanba agora daudaun ita iha faze kontrola nian espera tinan oin Organizasaun Mundiál Saúde bele fó ona sertifikadu eliminasaun moras malaria ba ita”, Inacio informa.
Nia esplika, profisionál saúde sira nafatin buka tuir kazu sira ne’ebé mak ho sintoma malaria hodi halo teste atu prevene nune’e kazu la bele kontinua mosu iha rai-laran.
Jornalista : Felicidade Ximenes
Editór : Zezito Silva
