DILI, 21 fevereiru 2023 (TATOLI)—Parlamentu Nasionál (PN) liuhosi reuniaun plenária, tersa ne’e, aprova votu solidariedade ba vítima dezástre naturál siklone Gabrielle iha Nova Zelándia.
“Rezultadu votasaun a-favór 35, kontra no abstensaun 0, nune’e votu solidariedade ba vítima siklone Gabrielle iha Nova Zelándia aprovadu,” Prezidente Parlamentu Nasionál, Aniceto Longuinhos Guterres Lopes, hateten iha sala plenária.
Deputadu proponente, AntoninHo Bianco, hateten hanesan membru Parlamentu hato’o votu solidariedade tanba situasaun ne’e akontese iha Nova Zelándia ema mate barak no sasán hetan estragu, nune’e lori povu Timor-Leste tomak hodi hato’o solidariedade kle’an ba povu no Governu Nova Zelándia.
Kauza hosi pasajen siklone Gabrielle, Nova Zelándia iha hela Estadu emerjénsia nasionál, dezde 14 fevereiru ne’e, tanba violentu siklone ne’ebé akontese iha nasaun ne’e ho rajada anin no udan ne’ebé forte hodi hamosu inundasaun no rai monu no estragu boot ba hela fatin, estrada no infraestrutura sira seluk.
Siklone Gabrielle rezulta pelumenus ema na’in-haat mate, inklui labarik ida, ema 10.500 liu tenke sai hosi uma, ema 225.000 liu tenke hela iha nakukun laran, laiha eletrisidade ka telekomunikasaun no populasaun barak mak izolada.
Akontese rai nakdoko ho magnitude 6,0 iha Illa Norte parte kosta nian, besik kapitál Wellington no halo nasaun tomak sente rainakdoko ne’e.
Jornalista : Nelson de Sousa
Editór : Cancio Ximenes
