BAUCAU, 21 fevereiru 2023 (TATOLI) – Komandu Polísia Nasionál Timor-Leste (PNTL) Munisípiu Baucau menus rekursu no ekipamentu atu atua atividade péska ilegál iha área jurizdisaun Baucau.
Komandante PNTL munisípiu Baucau, Superintendente António de Sá, esplika, atividade peska ilegál kontinua mosu iha tasi munisípiu Baucau ne’ebé deskonfia hala’o hosi peskadór estranjeiru hosi illa Kesar no Wetar, Indonézia ne’ebé tuda bomba hodi hamate ikan no estraga rikusoin iha tasi laran.
“Ita bele atua maibé laiha ekipamentu ne’ebé sufisiente hanesan ró entaun labele halo buat ida tanba ema-nia ró mákina boot,” Komandante PNTL munisípiu Baucau hateten iha Vila Nova, tersa ne’e.
Superintendente António de Sá, haktuir, iha semana kotuk mosu tán atividade peskasilegál iha área tasi Uaiwono, suku Tirilolo, postu Baucau vila ne’ebé tuda bomba ho distánsia hosi rai-maran purvolta kilómetru 2.
Informasaun ne’e PNTL Baucau simu hosi peskadór lokál no autoridade suku kona-ba atividade ilegál refere nune’e kontinua kedas destaka intelijénsia no Ofisiál Polísia Suku (OPS) hodi halo vijilánsia no konsege deteta maibé labele atua tanba laiha ekipamentu ró, maske informa ba komandu jerál hodi koloka Unidade Polísia Marítima (UPN).
“Ita-nia tasi luan deskontroladu tanba laiha rekursu, atividade sira-ne’e akontese maibé haree de’it tanba laiha ekipamentu atubele apoia ita,” Superintendente António de Sá akresenta.
Maske nune’e, komandu PNTL Baucau informa ona ba komandu jerál hodi hatutan ba Ministériu Interior no Ministériu Argikultura no Peska (MAP) hodi buka solusaun hanesan apoia ekipamentu ró no kria postu seguransa marítima nune’e halo patrulllamentu iha tasi munisípiu Baucau nian.
Nune’e mós kolabora ho FALINTIL-FDTL hodi informa ba Kuartel Jerál hodi hamutuk buka solusaun hanesan koloka komponente navál nune’e halo patrullamentu rútina iha tasi-laran.
Jornalista : Natalino Belo
Editór : Evaristo Soares Martins
