Don Virgílio : Kuarezma nu’udar tempu oportunidade atu hamoris filafali fiar
DILI, 22 fevereiru 2023 (TATOLI)—Arsebispu Arkidioseze Metropolitana Dili, Don Virgílio Kardeál do Carmo da Silva, SDB, hateten, kuarezma nu’udar tempo forte no oportunidade di’ak ba ema atu hamoris filafali virtude fiar ka fé, esperansa no karidade.
“Ohin, kuarta-feira sinza, ho simu ahi-kadesan iha rentos nian, nu’udar sinál ita hahú tan momentu foun ida ba ita hotu nu’udar ema ilas Maromak nian, ne’ebé rekoñese an nu’udar ida ne’ebé fraku no sala na’in iha Nai nia futar oin. Iha tempu kuarezma ida ne’e nu’udar tempo forte no oportunidade di’ak ba ema atu hamoris filafali virtude sira hanesan fiar ka fé, esperansa no karidade,” Don Virgílio Kardeál do Carmo da Silva, SDB, hateten, liuhosi nota komunikadu ne’ebé Agência Tatoli asesu kuarta ne’e.
Nia dehan, momentu simu ahi-kadesan ida ne’e, enkoraja hotuhotu, atu tau importánsia ba momentu ida ne’e hanesan momentu ne’ebé nakonu ho grasa, nune’e bele aproveita nu’udar we-matan ida hodi halo mudansa ba ema-nia moris.
“Ohin, ita hahú filafali ita-nia dalan konversaun nian, dalan transformasaun nu’udar ema fiar na’in ne’ebé insere-an iha Jesus Cristo nia dalan terus nian. La’o hamutuk ho nia, akompaña nia, no hamutuk ho nia ,” Don Virgílio hateten.
Nia dehan, tempu kuarezma hamoris filafali fiar ka fé, esperansa no karidade liuhosi prátika kuarezma nian hanesan orasaun, hadera-an no fó ezmola.
“Ha’u mós konvida ita hotu atu hahú no hala’o ita-nia retiru anual hamutuk ho nai Jesus kristu iha ita ida-idak nia dezertu”rasik durante loron 40 nia-laran. Iha periodu loron 40 nia laran ne’e, solisita ba ema hotu atu esforsu-an hodi halo mudansa ka transformasaun ida ba estilu moris nian,” nia heteten.
Nia dehan, kuarezma mak tempu grasa nian iha ne’ebé bele sente no hamoris oferta salvasaun hosi Maromak, liuliu ba sira be fiar iha nia liafuan.
Renovasaun fundamental no kle’an ba fuan no rekoñse katak presiza Maromak nia prezensa, nia tulun no nia salvasaun iha hotuhotu nia moris. Ho maneira rona Maromak futar lia, disponibiliza an atu simu no hala’o iha prátika aliansa ne’ebé Maromak halo ona ho nia povu Israel liuhosi profeta sira.
“Kuarezma ida ne’e nu’udar tempo forte ida atu ita bele filafali ba ita nia-an, rekoñese frakeza no erro sira liuliu buat sira ne’ebé ladi’ak no nakonu ho gostu hedonista, individualista, indiferente no maluk sira. Dalan ida ne’e nu’udar dalan ba mudansa moris ida ne’ebé di’ak liu,” Don Virgílio hateten.
Kuarezma nu’udar, dalan ida nu’udar prosesu ida ne’ebé la’o kontinua ba ema nia moris. Tan ne’e, nesesáriu tebes atu bele kontinua hala’o nu’udar maneira ida hodi kultiva nafatin fiar.
“Ho liafuan seluk, kuarezma nu’udar tempo forte atu hodi intensifika no reforça ita-nia relasaun ho Nai Maromak. Relasaun ida ne’ebé forte no halo fresku nafatin moris espirituál nian,” nia dehan.
Ba tempu kuarezma iha Saun Bento subliña ninia reflesaun kona-ba kuarezma nian katak tempu kuarezma ne’e nu’udar primaveira ida ba moris sarani nian. Signifika hatubun no haburas filafali espíritu moris nian, hadi’a no transforma fila-fali moris ne’ebé ladún di’ak ba moris di’ak liu, iha no liuhosi transformasaun iha Kristu nia Páskua.
Jornalista : Arminda Fonseca
Editora : Armandina Moniz
