DILI, 22 fevereiru 2023 (TATOLI) – Primeiru-Ministru (PM), Taur Matan Ruak, aseita ho desizaun Prezidente Repúblika (PR), José Ramos Horta, ne’ebé dekreta ona loron Eleisaun Parlamentár iha 21 maiu 2023.
“Prezidente Repúblika marka tiha ona [data ba eleisaun], ne’ebé la apoia mós atu halo oinsá tan. Ne’e hanesan ita ko’alia karik ne’e lahalo ona”, Matan Ruak dehan iha konferénsia imprensa, iha Aeroportu Internasionál Prezidente Nicolau Lobato, Comoro, hafoin fila hosi vizita traballu bá Indonézia no Singapura.
Xefe Governu ne’e akresenta la fó komentáriu ligadu ho diskusaun iha públiku kona-ba loron eleisaun ne’ebé monu iha domingu.
Antes ne’e, Matan Ruak hatete ona katak Governu prontu apoia desizaun Xefe Estadu nian ba dekreta loron eleisaun no Ezekutivu mós prontu atu realiza sufrájiu ne’e la’o ho di’ak.
Iha 13 fevereiru, Ramos Horta dekreta ona loron Eleisaun Lejizlativa. Antes marka loron refere, Prezidente Repúblika hala’o ona konsulta hodi rona Governu, partidu ne’ebé asentu no la asentu iha Parlamentu, inklui órgaun eleitorál sira-nian kona-ba preparasaun atu realiza eleisaun ne’e.
Relasiona ho data sufrájiu ne’e, Konferénsia Episkopál Timorense (CET, sigla portugés) fó sai komunikadu katak rona preokupasaun sarani katólika iha Timor-Leste, CET tetu katak pozisaun uma kreda respeita desizaun Xefe Estadu nian no husu sarani sira atu kumpre devér atu partisipa misa no tuir votasaun ne’ebé akontese iha domingu.
“Fó hanoin ba timoroan hotu atu ezerse direitu partisipasaun ho paz, domin no responsabilidade hodi respeita malu iha Eleisaun Lejizlativa dezde períodu kampaña politíka to’o loron votasaun”, refere nota husi CET.
Kona-ba loron kampaña eleitorál, Sekretariadu Tékniku Administrasaun Eleitóral (STAE) publika ona katak sei hahú iha 19 abríl.
Jornalista: Antónia Gusmão
Editora: Maria Auxiliadora
