DILI, 22 fevereiru 2023 (TATOLI) – Primeiru-Ministru (PM), Taur Matan Ruak, no Xefe Governu Singapura, Lee Hsien Loong, diskute asuntu rua kona-ba apoia Timor-Leste atubele prepara-aan di’ak liu ba adere ASEAN no kooperasaun téknika ba planu urbanizasaun nian.
“Agradese ba apoia sira ne’ebé durante Singapura fó. Ha’u aprezenta mós imajen jerál ita-nian rain, nomós haree aspetu sira serbisu hamutuk iha tempu oin-mai. Ami foku liu ba asuntu rua, hanesan oinsá Singapura apoia Timor-Leste atubele prepara-aan di’ak liu ba iha ASEAN no seluk mak posibilidade aban-bainrua iha kooperasaun téknika, hanesan planu urbanizasaun”, Taur informa, iha Aeroportu Comoro, hafoin fila husi Singapura.
Matan Ruak realsa katak Singapura hanesan rai ki’ik ida no Timór ki’ik liután, nune’e bainhira organiza didi’ak provavelmente bele manán buat ruma bainhira halo kooperasaun di’ak.
“Ita haree Singapura maiór investidór iha ita-nian rain. Sira halo investimentu liu millaun $800. Ninia valór globál komérsiu ho Timór besik millaun $200. Ita sosa sira millaun $70-resin no sira sosa ita millaun $120-resin, ne’ebé manán ne’e hosi ita-nian parte”, Xefe Ezekutivu ne’e relata.
Kompara ho Indonézia, Primeiru-Ministru salienta Timor-Leste sosa sasán kuaze millaun $200 no sira sosa kuaze millaun $2 no sira-nian investimentu tinan 20, millaun $120-resin. “Ne’e signifika défise boot ida dezfavór Timor-Leste nian. Maibé ne’e mak esforsu ne’ebé Timór halo, entende no halo oinsá mak esplora di’ak liu iha tempu sira mai hodi fó vantajen ba dezenvolvimentu nasaun nian”, katak.
Matan Ruak dehan Xefe Governu Singapura manifesta totalmente apoiu Timór, la’ós de’it tama iha ASEAN, maibé mós integra-aan di’ak liu iha ekonomia rejiaun nian, tanba ne’e dezafiu boot ba Timór.
Lembra katak iha enkontru Xefe Governu rai rua ne’e, Ezekutivu Singapura reitera nia apoiu ba Timor-Leste iha formasaun ba rekursu umanu, reforsa kooperasaun bilaterál no adezaun ba ASEAN.
Xefe Governu Singapura afirma, iha nia pájina Facebook, ne’ebé Tatoli asesu katak, iha inísiu fulan ne’e, ba dahuluk Timor-Leste partisipa iha reuniaun Ministru Negósiu Estranjeiru ASEAN sira-nian hanesan país observadór.
“Ne’e marka istória ida. Singapura disponível atu apoia prosesu integrasaun no hakarak ajuda kompleta kritériu sira ba adezaun”, Xefe Ezekutivu singapurianu ne’e realsa.
Lee Hsien Loong informa katak kontente hasoru malu ho nia omólogu, Taur Matan Ruak, atu reafirma “amizade entre Singapura no Timor-Leste”, no ho enkontru ne’e, “sai forsa liután”. “Ha’u konfia katak ita-nian relasaun bilaterál sei forte liután ita tinan sira tuirmai”, Lee Hsien Loong konklui.
Notísia relevante: PM Taur: Indonézia manifesta disponibilidade apoia Timor-Leste
Jornalista: Antónia Gusmão
Editora: Maria Auxiliadora
