DILI, 23 fevereiru 2023 (TATOLI) – Diretór Asuntu Konsulár no Komunidade Timoroan Hermínio Pinto, informa tempu besik ekipa hamutuk ho Sekretariadu Tekniku Administrasaun Eleitorál (STAE) no Komisaun Nasionál Eleisaun (CNE-sigla portugés) sei aranka ba diaspora hodi halo resensiamentu eleitorál.
“Agora daudaun, ami halo hela preparasaun no la kleur tan ekipa integradu kompostu hosi STAE, CNE no MNEK sei dezloka ba Austrália, Koreia Súl, Inglaterra no Portugal hodi halo resensiamentu eleitorál iha loron 01 marsu to’o 01 abril”, Hermínio Pinto, dehan ba jornalista sira iha edifísiu MNEK, ohin.
Nia apela ba sidadaun timoroan hotu iha diaspora liuliu nasaun hirak ne’ebé mensiona hodi hakat ba embaixada sira hodi halo resensiamntu eleitorál atu bele partisipa iha votasaun ba eleisaun parlamentár ne’ebé sei akontese iha 21 maiu mai ne’e.
“Apela ba ita nia sidadaun sira iha diáspora atu aproveita tempu ne’ebé mak iha atu mai partisipa hodi resensia sira nia aan no atualiza baze dadus, atu sira bele ezerse sira nia direitu iha eleisaun parlamentár ne’ebé sei mai”, nia dehan.
Nia hatutan, ekipa nafatin halo atendimentu ba sidadaun hotu, segunda to’o domingu tanba maioria timoroan barak okupadu ho servisu.
“Ekipa sei halo nafatin atendimentu iha loron sábadu no domingu tanba konsidera katak ita nia sidadaun sira ne’e iha segunda to sexta sira okupadu ho sira-nia servisu tanba ne’e mak ami iha hanoin ida atu oinsa halo atendimentu di’ak ba ita-nia sidadaun sira iha sábado no domingu”, nia haktuir.
Iha Austrália, estabelese sentru resensiamentu, Darwin, Sydney sei abranje ba Adelaide no Canberra, sei inklusivu móvel ba Melbourne, Queensland, Tasmania no Perth.
Enkuantu iha Koreia Súl, resensiamentu eleitorál sei halo iha sidade rua, Seoul e Gwangju.
Nune’e iha Inglaterra, sentru resensiamentu sei hala’o iha Oxford, Peterborough, Crewe, Bridgewater, Dungannon no Belfast. Portugal, sentru resensiamentu sei halo iha Lisboa no sei inklusivu móvel ba Portu, Beja, Bragança, Coimbra, Évora, Fundão, Mirandela no Tondela.
“Informação sira ne’e ami mós koordena ona ho embaixada sira iha nasaun sira atu oinsa bele dizemina informasaun liuhosi meiu rede sosiál ka facebook embaixada nian ba timoroan sira atu partisipa iha prosesu resenseamentu ne’e”, nia realsa.
Nia fo hanoin, dokumentu ne’ebé timoroan sira presiza iha prosesu resensiamentu mak hanesan passaporte ou bele mós bilete Identidade ou kartaun eleitorál.
Hosi resensimentu ne’e mak foin bele hatene timoroan nain hirak maka hakarak partisipa iha votasaun postál.
“Ida ne’e hanesan mós faze ida atu buka hatene sidadaun sira ne’ebé iha rezidente permanente atu partisipa iha votu postál. Se sira hakarak votu postál bele komunika no koordena ho embaixada hodi fo sira nia enderesu atu bele koordena ho STAE haruka votu postál ba ita-nia embaixada no ita-nia embaixada haruka ba sira-nia hela fatin no bainhira sira vota hotu hatama fali buletin votu ne’e iha envelope no haruka mai embaixada ka sentru votasaun hodi halo kontajen”, nia hakotu.
Jornalista:Hortencio Sacehez
Editór : Zezito Silva
