Top

Aniceto Guterres: meza kontinua ajenda eleisaun ba Komisáriu CAC

Prezidente Parlamentu Nasionál, Aniceto Longuinhos Guterres Lopes. Imajen Tatoli/Antonio Daciparu.

DILI, 23 fevereiru 2023 (TATOLI)—Prezidente Parlamentu Nasionál (PPN), Ancieto Longuinhos Guterres Lopes, hateten meza kontinua ajenda iha reuniaun plenária iha loron segunda no tersa ba eleisaun ba Komisáriu Komisaun Antí Korrupsaun (CAC, sígla portugés).

Notísia Relevante: PN adia eleisaun ba Komisáriu CAC tanba la prenxe korum

“Ajendamentu la’o nafatin, lei dehan tenke Deputadu na’in-49 prezente. Ajenda nafatin, bainhira prienxe ona korum, ita sei realiza,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira iha PN, kinta ne’e.

Bankada CNRT rasik fó sai ona hodi haruka karta ba meza sei la tuir reuniaun plenária ba eleisaun komisáriu CAC foun, tanba sira husu presiza iha konsensu entre bankada liu-liu ho FRETILIN, inklui ho razaun seluk mak ajenda ne’e laiha konvokatóriu reuniaun líder bankada halo de’it ajenda iha plenária.

“Bele iha razaun polítika, ha’u ko’alia em nome Estadu ne’e órgaun Estadu la devia bankada CNRT trava prosesu ida-ne’e. Atu vota kontra iha direitu, ne’e iha devér ida labele prosesu. Tanba, interrese Estadu, órgaun Estadu ida labele hosik hela mamuk situasaun laiha serteza hanesan ne’e,” nia dehan.

Tan ne’e, nia dehan, direitu sira-nian la partisipa maibé ne’e órgaun Estadu signifika Komisáriu CAC laiha, ne’e afeta mós ba iha prosesu investigasaun ba kazu korrupsaun sira.

“A ñao ser ita lakohi prosesu sira-ne’e la’o ka ita lakohi CAC ne’e iha karik. Tanba ne’e, se sira la partisipa, meza kontinua ajenda nafatin,” nia hateten.

Tuir Aniceto Guteres, nia parte la kumpreende komunikasaun saida mak bankada CNRT hakarak, se komunikasaun kona-ba kandidatu ne’e komunikasaun entre bankada la’ós ho Prezidente Parlamentu Nasionál.

“Hau konvida konvokatória sai ho ajenda eleisaun ba Komisáriu CAC, konferénsia atu konsulta bankada parlamentár maibé sira la mosu mai ne’e, halo nusa. Meza labele hein konferénsia to’o realiza mak bele ajenda, tanba situasaun Komisáriu mamuk tiha ona tanba haree mandatu termina dezde 21 janeiru 2023,” nia dehan.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!