DILI, 23 fevereiru 2023 (TATOLI) – Konsellu Ministru aprova ona Rezolusaun Governu kona-ba abertura área sira ba realizasaun atividade no termu referénsia konkursu nian ba atribuisaun direitu mineiru.
“Rekoñese katak potensiál ekonómiku rekursu minerál ne’ebé eziste iha territóriu iha Timor-Leste, Governu aprova abertura ba área hitu ba atividade minerál”, Ministru Prezidénsia Konsellu Ministru informa iha Palásiu Governu.
Fidélis Magalhães adianta katak área hitu ne’e identifika iha territóriu Timór no kada fatin ne’ebé identifikadu iha rikusoin katak ida ne’ebé bele sai hanesan poténsia ba esplorasaun.
Ho ida ne’e, Ezekutivu autoriza Autoridade Nasionál Petróleu no Minerál (ANPM) hodi lansa no halo prosedimentu konkursu nian ba atribuisaun direitu minerál prospesaun no esplorasaun ba minériu metáliku.
“Diamente, fatuk no minerál industriál ka la inklui materiál konstrusaun, minéiru radioativu, minériu terras raras no karvaun iha zona sira ne’ebé deklara ona ba atividade minerál nian sira”, nia esplika.
Biban hanesan, Ezekutivu aprova mós termu referénsia ne’ebé estabelese rekezitu minímu, kritériu sira selesaun no regra prosedimentu relevante sira konkursu públiku nian atu konkorente sira satisfaz no halo tuir.
Iha 16 novembru 2022, Governu aprova ona projetu dekretu-lei kona-ba abertura área hala’o atividade mineira no aprovasaun ba termu referénsia ba konkursu atu fó direitu mineiru ba esplorasaun no produsaun materiál konstrusaun iha área tolu ne’ebé hetan ona autorizasaun.
Kona-ba aprovasaun termu referénsia ba abertura konkursu atribuisaun direitu mineiru ba esplorasaun no produsaun materiál konstrusaun iha área konsesaun tolu ne’ebé define ona mak iha mota Loes ne’ebé lokaliza iha munsípiu Liquiçá, mota Laclo no mota Laleia lokaliza iha munisípiu Manatuto.
Antes ne’e, eis-Prezidente Repúblika, Francisco Guterres Lú Olo, promulga ona projetu-lei númeru 4/V (1a) Kódigu Mineiru, ne’ebé tama vigór iha loron 01 janeiru 2022, ne’ebé halo ona diseminasaun, iha setembru to’o dezembru 2021, no kontinua fali iha tinan 2022 to’o nível postu administrativu, liuliu área ne’ebé identifikadu iha potensiál ba rekursu naturál.
Objetivu prinsipál hosi diseminasaun atu fó efeitu ba esplorasaun no esploitasaun atividade mineira ho komóditi mineiru. Tanba Timor-Leste iha tipu minerál hosi metáliku, non metáliku, no minerál estratéjiku hanesan terra estrada, radiativu, tanba ne’e tenke iha lei hanesan Kódigu Mineiru ne’ebé sai hanesan lei inan ba atividade mina no esplorasaun inklui minerál.
Notísia relevante: Governu define área konsesaun tolu hala’o atividade mineira
Jornalista: Antónia Gusmão
Editora: Maria Auxiliadora
