DILI, 23 fevereiru 2023 (TATOLI)—Eletrisidade de Timor-Leste, Empresa Públika (EDTL,E.P), identifika uma-kain neen (6) iha suku Lahane Orientál, postu administrativu Nain-Feto, munisípiu Dili, halo ligasaun ilegál, ba liña eletrisidade hodi uza hala’o atividade negósiu no ba sasán eletróniku sira seluk.
Ekipa EDTL,E.P identifika uma-kain neen iha suku Lahane Orientál halo ligasaun ilegál ne’e liuihosi Tékniku Distribuisaun Apoiu Konsumidór, ne’ebé kinta ne’e, hala’o inspesaun ba kontadór pré-pagu ba komunidade nia uma iha área Teporal, Berbidu, suku Lahane Orientál, Munisípiu Díli.
Bazeia ba nota komunikadu ne’ebé Agência Tatoli, asesu kinta ne’e, relasiona ho aktu hirak ne’e, bazeia ba lei númeru 33/2026, agostu ne’ebé hateten, kliente hotu iha devér selu ka sosa pre-pagu bainhira uza enerjia elétrika.
Nune’e, ekipa tékniku EDTL,E.P halo kedas desligasaun no monta kontadór pré-pagu foun ba uma hirak ne’e no notifika hodi aplika multa bazeia ba kategoria uzu enerjia.
Kona-ba númeru montante multa hahú hosi $100 to’o $2.000 maibé depende ba sira-nia dizultór amper ne’ebé komunidade uza.
Maske nune’e, komunidade iha área refere koopera hodi selu bazeia ba multa ne’ebé EDTL,E.P aplika.
Tuir planu EDTL,E.P sei kontinua halo inspesaun jerál ba kontadór pré-pagu ne’ebé instaladu ona iha munisípiu sira inklui Dili.
Jornalista : Arminda Fonseca
Editora : Armandina Moniz
