Eskola 14 iha Baucau sei konstrui tinan ne’e
BAUCAU, 23 fevereiru 2023 (TATOLI) – Eskola hamutuk 14 iha munisípiu Baucau sei konstrui infraestrutura liuhosi Programa Konstrusaun no Reabilitasaun Eskolár hosi Ministériu Edukasaun, Juventude no Desporta (MEJD) iha tinan 2023.
Diretór Servisu Munisipál Edukasuan Baucau, Augosto Ornai Ximenes, esplika, munisípiu Baucau hato’o ona proposta planu infraestrutura ba MEJD nasionál hamutuk eskola 24 maibé parte ministériu aprova eskola 14 mak sei sai benefisiáriu ba programa PKRE tinan 2023.
“Ministériu aprova liuhosi fundu infraestrutura ne’ebé sei implementa liuhosi projeitu komunitáriu iha tinan-ne’e hamutuk eskola 14,” Diretór Servisu Munisipál Edukasuan Baucau hateten iha Sentru Konvensaun Baucau (CCB, sigla portugés), kinta ne’e.
Hosi projeitu hirak-ne’e, edukasaun munisipál forma ona grupu komunitáriu 13 ne’ebé tuir planu sei halo lansamentu iha inísiu fulan-abríl ne’ebé priopridade liuba eskola pre-eskolár.
Servisu Munisipál trasa ona planu proposta iha área infraestrutura ne’ebé kada tinan presiza fó prioridade ba infraestrutrura eskola mínimu 24 to’o 30 maibé pedidu refere sei deside hosi Diresaun Nasionál Parke Eskolár hosi MEJD nian.
“Orsamentu ita seidauk hatene maibé postu Quelicai mak projetu neen, postu seluk balun tolu, rua hamutuk hotu mak 14,” Augostu Ximenes akresenta.
Hosi projetu 14 refere sei konstrusaun sala aprendizajen, eskritóriu profesór inklu hariis-fatin ne’ebé kada pre-eskolár sei kontrui sala aula tolu, enkuantu ba ensinu báziku no sekundária sei kontrui sala tolu to’o neen.
Maske nune’e, hosi totál eskola 243 iha munisípiu Baucau, edukasaun Baucau sei kontinua esforsu hato’o ba nasionál nune’e presiza fó atensaun tanba maioria kondisaun sei aat.
Jornalista : Natalino Belo
Editór : Evaristo Soares Martins
