MESSK husu komunidade uma kain 29 iha Aileu hakbesik-an ba Governu
DILI, 23 fevereiru 2023 (TATOLI)–Ministru Ensinu Superiór Siénsia no Kultura, Longuinhos dos Santos, hateten VIII Governu Konstitusionál liuhosi MESSK husu ba komunidade uma kain 29 ne’ebé kontinua la kontente ho indemnizasaun ne’ebé Governu atribui ona bele hakbesik-an ba Governu.
Nia hatutan, kestaun ka prosesu kona-ba sidade Universitáriu Aileu ne’e la’o dook tiha ona, maibé agora iha fali asaun la kontente hosi komunidade uma kain 29 ne’ebé hato’o sira-nia lamentasaun bainhira prosesu hotu rezolve tiha ona inklui pagamentu ba indemnizasaun la’o hotu ona.
“Ha’u hakarak dehan se komunidade afetadu iha projetu futuru sidade Universitáriu Aileu, komunidade uma kain 29 ne’ebé sira-nia naran konklui ona alista iha lista indemnizasaun ne’e mak sira la kontente hakarak halo indemnizasaun bele mai hakbesik-an ba governu sei iha disponibilidade. Maibé lakohi la problema, tanba ne’e sira nia direitu,” Ministru Longuinhos hateten ba jornalista sira hafoin ramata enkontru ho Konsellu Ministru ne’ebé hala’o iha Palásiu Governu, kinta ne’e.
Maibé, nia husu ba komunidade uma kain 29 ne’ebé lamenta ho planu VIII Governu Konstitusionál nian atu harii sidade universitáriu iha Aileu ne’e, MESSK la taka dalan no prontu simu reklamasaun hosi komunidade sira atu bele prosesa kona ba indemnizasaun ba sira maibé labele trava dezenvolvimentu ne’ebé Governu planeia ona.
Governante ne’e haktuir katak asaun protesta ne’e diretu komunidade sira-nia maibé interrese nasionál ba joven nia futuru tenke kontinua hakat ba oin nafatin, tanba ne’e VIII Governu Konstitusionál nian kompromisu.
“Ha’u hakarak dehan ba futuru joven nian no interrese nasionál dezenvolvimentu tenke hakat ba oin nafatin,” nia dehan.
Enkuantu molok VIII Governu realiza serimónia tau fatuk dahuluk ba konstrusaun sidade universitáriu Aileu, antes ne’e Ministériu halo ona konsultasaun ho komunidade inklui autoridade lokál sira hotu iha Aileu, atu hetan de’it apoiu ba planu VIII Governu nian.
Esforsu sira-ne’e ikus mai konsege finaliza ninia prosesu tomak inklui dezeñu no Planta no Kadernu Enkargu (BoQ) no agora hein de’it atu halo moru ba sidade Universidade Aileu.
Jornalista : Tomé Amado
Editór : Cancio Ximenes
