OÉ-CUSSE 23 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, enkoraja setór privadu sira iha Oé-Cusse hodi kontribui ba implementasaun grande mega projetu sira hodi lori dezenvolvimentu ba povu ho kualidade.
Ezekutivu ne’e hato’o epseransa ne’e, iha konferénsia Kámara Komérsiu Indústria Timor-Leste (CCI-TL, sigla portugés), datoluk hodi hili estrutura foun ba períodu tinan lima hahú 2023 to’o 2027 ne’ebé realiza iha otél Ambeno Oé-Cusse, kinta ne’e.
“Hanesan Prezidente Autoridade, ha’u-nia esperansa boot ba CCI nu’udar setór privadu iha RAEOA, tanba investimentu ne’ebé ita sei halo barak tebes, tanba iha tinan ne’e, RAEOA nia orsamentu millaun $120, Autoridade RAEOA presiza belun atu kontribui ezekuta orsamentu ne’ebé maka iha ba prosesu dezenvolvimentu iha Oé-Cusse,” Arsénio ko’alia iha konferénsia CCI-TL datoluk iha otél Oéupun.
CCI-TL iha Oé-Cusse, nu’udar parsériu Autoridade, iha tinan rua nia laran, iha mandatu Autoridade ida-ne’e, selebra kontratu barak ona, ne’e ba investimentu públiku, seidauk konta ho investimentu privadu ninian.
“Investimentu ba setór públiku, ha’u esperu iha estrutura CCI foun ne’e, ha’u hakarak iha diskusaun barak ho Autoridade iha kontaktu barak hodi mellora relasaun entre Autoridade ho CCI, tanba ha’u hakarak iha melloramentu ba jestaun iha emprezariál ninian, melloramentu iha jestaun projetu,” nia afirma.
Tuir ezekutivu ne’e katak, tanba iha projetu balu iha Oé-Cusse nia lala’ok kleur, entaun ba futuru ita-hotu nia hakarak presiza esforsa halo mudansa uitoan, tanba ita tenke duni dezenvolvimentu ne’e tenke kontinua, no kualidade ne’e tenke aumenta, ne’e ba investimentu públiku, autoridade persiza parsériu hosi setór privadu.
Prezidente CCI-TL iha Oé-Cusse Eurico da Rosa, hatete, organizasaun CCI hanesan non-profit, estabelese iha 2010, ho objetivu atu reprezenta setór privadu hanesan parsériu estratéjiku ba dezenvolvimentu Timor-Leste.
Formalmente bazea ba rezolusaun Governu nú.17/2010, hanesan organizasaun ida ho nia rejimentu, kada tinan haat tenke halo nia konferénsia, hodi hili fali nia prezidente no estrutura foun hodi kontinua vizaun no misaun CCI nian.
“Tanba ne’e ohin loron ita hamutuk iha fatin ne’e konsege realiza konferénsia ba dala tolu RAEOA,” nia afirma.
Nu’udar Prezidente CCI atuál iha Oé-Cusse, espera ba futuru karik iha prezidente foun mak eleitu liuhosi konferénsia datoluk ne’e, presiza kolabora no servisu hamutuk lori CCI ba futuru nia di’ak hametin relasaun ho Autoridade no parsériu sira hodi kontribui ba dezenvolvimentu ekonómiku iha Oé-Cusse.
“Ohin ita hili estrutura foun ba CCI iha RAEOA. Ohin loron bele la’o ho di’ak no susesu hatuur ho demokrasia, no mós independente la haree ba kór partidu, tuir papél loloos hosi CCI, katak tenke mantein nia pozisaun hanesan organizasaun independente, ida-ne’ebé mai ho objetivu boot ba interese setór privadu iha Oé-Cusse,” nia tenik.
Nia akresenta, durante mandatu bainhira forma estrutura, organizasaun CCI Oé-Cusse, sempre ativu no partisipa direita iha enkontru formál hosi Autoridade no no nível hodi habelar informasaun ba setór privadu hotu iha Oé-Cusse, hodi hamutuk kontribui konstrusaun Estadu Timor-Leste.
Entretantu, partisipa iha konferénsia CCI datoluk ne’e, mai hosi membru Autoridade RAEOA, reprezentante Governu Sentrál mai hosi Ministéru Koordenadór Asuntu Ekonómiku (MKAE), seguransa F-FDTL no PNTL, diretór kompañia no asosiasaun emprezáriu sira mai hosi sub-rejiaun Oésilo, Pássabe, Nítibe no Pante Makasar.
Jornalista: Abílio Elo Nini
Editór: Evaristo Soares Martins
