BAUCAU, 23 fevereiru 2023 (TATOLI) – Programa Nasionál Dezenvolvimentu Suku (PNDS) hosi nasionál, tersa ne’e sosializa atividade nível munisipál ba autoridade lokál xefe suku iha munisípiu Baucau.
Sekretária Ezekutiva PNDS nasionál, Claudina Soares Pinto, esplika, daudaun ne’e iha mudansa atividade prinsipál sira hanesan siklu implementasaun, prosesu no prioridade hosi nível aldeia to’o suku liuliu identifikasaun ba benefisiáriu sira.
“Importante tebes atu informasaun ne’e fahe ba autoridade lókal sira tanba xefe suku ho komunidade mak sai autór prinsipál ba prosesu hotu implementasaun atividade PNDS nian,” Sekretária Ezekutiva PNDS hateten iha Sentru Konvensaun Baucau (CCB, sigla portugés), kinta ne’e.
Objetivu hosi sorumutu refere atu fahe informasaun ba autoridade lokál xefe suku sira kona-bá lala’ok implementasaun atividade PNDS nian ho orsamentu ne’ebé prevee ba suku iha munisípiu Baucau.
Atividade PNDS nian bazea ba kuarta alterasaun dekretu-lei nian númeru 8/2013 ne’ebé regulariza kona-na lala’ok implementasaun hotu inklui mudansa prosesu atividade PNDS nian ne’ebé durante ne’e implementa iha baze.
Mudansa seluk mak siklu implementasaun ne’ebé antes ne’e sanulu resin-rua redús ba ualu ho objetivu atu fasilita burokrasia durante implementasaun nune’e garante iha munisípiu laiha dupla projetu entre Planu Dezenvolvimentu Integradu Munisipál (PDIM) no programa PNDS nian.
“Ita hakarak evita projetu dupla nune’e, suku sira-nia atividade kuandu finansia ona hosi PNDS entaun munisípiu bele halo fali atividade seluk,” Caludina Pinto akresenta.
Munisípiu Baucau hetan alokasaun orsamentu hamutuk tokon $3 ne’ebé sei utiliza ba atividade hanesan PNDS-regular, enkuantu Uma Naroman ba Povu (UPN) hamutuk orsamentu tokon $9.8 hosi tótal ne’e sei implementa ba atividade tipu UPN-regulár tokon $3.1, UKL-plus A tokon $.5.6 no UKL-plus B tokon $1.
Jornalista : Natalino Belo
Editór : Evaristo Soares Martins
