PNT konsege salva ema moras TB kuaze 91%
DILI, 23 fevereiru 2023 (TATOLI) – Xefe Programa Nasionál Tuberkuloze (PNT) iha Ministériu Saúde Constantinho Lopes, dehan atividade screening hodi deteta sedu ba moras tuberkuloze iha territóriu nasionál, konsege salva ema kuaze pursentu 91 tanba ho programa ne’e bele ajuda pasiente sira hodi halo trantamentu no konsege rekopera.
“Durante tinan kotuk 2022, ami haree ba rezultadu tratamentu kuaze 91% susesu ba tratamentu no rekopera”, Lopes relata ba jornalista sira bainhira partisipa iha workshop nasionál kona-ba Asembleia Fundu Global Timor-Leste iha salaun CNE Colmera, ohin.
Lopes konta, esperiénsia ne’ebé mak ekipa hasoru mak dalaruma membru uma-kain balun lakohi screening maibé pesoál saúde sira nafatin konsola hodi hetan screening atu halo tratamentu saúde, hirak ne’ebé deteta barak liu iha Munisípiu Ermera, Dili, Liquiça, Covalima no Manufahi.
“Tratamentu preventivu, ami uza rejimentu rua, mak rejimentu ne’ebé ami uza ba labarik idade 14 mai kraik, ami fó ai-moruk rivian vision isoniazid lorloron durante fulan tolu no sira ne’ebé mak ho idade15 ba leten, ami fó rifiampitine isoniazid, semana ida dala durante fulan tolu signifika fulan tolu ne’e sira konsumu aimoruk ida ne’e”, nia esplika.
Nia fó razaun katak tratamentu ne’ebé ekipa sira fó tanba hakarak halo prevensaun ba moras, tanba sira kontatu uma-laran, automatikamente infetadu ona ho bateria TB, entaun tenke fó tratamentu preventiva atu bele hamate tiha bateria ne’e iha sira nia isin antes dezenvolve ba moras tuberkuloze.
“Ami deteta pasiente TB iha 2022 hamutuk 5.370 iha Timor-Leste, husi númeru ne’e, mai husi pozitivu extra pulmonari, diagnsótiku klíniku maibé sira ne’ebé mak pozitivu loloos hamutuk 2.581. Entaun ami hahú muda ami nia estratejia katak ba ema sira pozitivu TB hamutuk 2.581 ne’e, ami halo screening hotu kedas ba nia membru família sira atu depois ami halo tratamentu ba membru uma-kain sira ne’ebé iha, ami bele fó tratamentu preventiva”, nia revela.
Nia subliña, iha 2023 sei aumenta karreta movél atu halo screening ba área ne’ebé sai alvu atu hasae kapasidade instrumentu diagnóstiku no hakbesik liután ba komunidade sira liuliu lori ho x-ray movel ba komunidade sira atu halo screening ba sira.
Jornalista : Felicidade Ximenes
Editór : Zezito Silva
