DILI, 23 fevereiru 2023 (TATOLI) – Konsellu Ministru aprova alterasaun dahuluk ba Dekretu-Lei n.u 22/2022, loron 11 fulan-maiu, kona-ba Rejime Jurídiku Aprovizionamentu, Kontratu Públiku no ninia Infrasaun sira, ne’ebé aprezenta hosi Ministru Finansa, Rui Gomes.
“Alterasaun ida-ne’e ninia objetivu atu halo korresaun ba gralla iha diploma ida-ne’e, kona-ba data termu períodu tranzitóriu utilizasaun ba lian sira serbisu nian, ne’ebé define ona iha n.u 3 husi artigu da-195 husi dekretu-lei refere, ne’ebé oras ne’e define hanesan loron 31 fulan-dezembru tinan 2023”, Ministru Prezidénsia Konsellu Ministru, Fidélis Magalhães, dehan iha Palásiu Governu.
Governante ne’e realsa katak empreza barak mai hosi ASEAN no nasaun seluk ne’ebé mak uza lian inglés hanesan língua traballu, “entaun ho ida ne’e Konsellu Ministru konkorda katak adia lai rekezitu ida atu uza de’it lian ofisiál ne’e no bele permite nafatin iha periúdu tranzitóriu ne’e uza ba lian traballu to’o 31 dezembru tinan ne’e”, nia afirma.
Hodi hatutan, sé la’e empreza sira ne’ebé mak atu kompete tenke halo hotu dokumentu sira iha lian portugés no sei difikulta sira bainhira seidauk iha koñesementu sufisiente ba iha uza lian refere. “Mezmu iha Komisaun Nasionál Aprovizionamentu sira mós bele ona uza lian portugés, maibé dala barak serbisu ho dokumentu sira ho lian inglés”, afirma.
Nune’e, atu laiha impedimentu ba prosesu aprovizionamentu sira Konsellu Ministru aprova alterasaun.
Jornalista: Antónia Gusmão
Editora: Maria Auxiliadora
