VIQUEQUE, 23 fevereiru 2023 (TATOLI)- Prezidente Konsellu Veteranu, Munisípiu Viqueque, Adriano Camara ‘Lentil’, husu ukun-na’in sira atu ka’er metin unidade nasionál hodi hala’o dezenvolvimentu liuliu kombate ki’ak no mukit iha Timor-Leste.
“Ha’u husu ba ukun na’in sira tenke ka’er metin unidade nasionál hodi lori nasaun Timor-Leste ba oin. Tanba ulun boot sira laiha unidade ne’e nasaun la’o ladun di’ak. Partidu sira tenke la’o tuir dalan demokrásia hodi labele lori interese partidu hodi lori povu maka sai vitima”, Veteranu Adriano Camara “Lentil” hateten asuntu ne’e relasiona ho selebrasaun loron veteranu nasionál dala-toluk iha loron 3 marsu, iha kuarta ne’e.
Iha selebrasaun loron veteranu ne’e, nia mós hato’o mensajen ba veteranu tinan 24 sira-ne’ebé sei ativa iha FALINTIL-Forsa Defeza Timor-Leste (F-FDTL) atu kontinua hametin unidade hodi kontribui mós ba dezenvolvimentu nasionál.
Ba juventude sira, nia dehan tenke so’e komportamentu ka atitude ne’ebé envolve konflitu hodi kontribui ba pás no estabilidade hodi sai joven kreativu ba apoia dezenvolvimentu nasionál.
“Ha’u husu joven sira kria unidade, maske envolve Grupu Arte Marsiál, maibé halo parte hanesan desportiva hodi salva-an. Bainhira veteranu sira laiha jerasaun foun maka lori nasaun ne’e ba oin, tanba ne’e tenke prepara mentalidade di’ak hodi troka veteranu sira”, nia sujere.
Nia enkoraja juventude sira kontinua estuda hodi sai matenek hodi sai lideransa iha futuru hodi kontinua dezenvolve nasaun atu kombate ki’ik no mukit tuir mehi eroi libertasaun sira nian.
Veteranu 20 sei partisipa komemora loron veteranu
Veteranu tinan 24 ne’e afirma daudaun ne’e prepara ona veteranu na’in 20 hodi ba partisipa eventu komemorasaun ne’ebé sei realiza iha Sentru Konvensaun Dili (CCD-sigla portugés) iha loron 3 marsu.
Tema ba komemorasaun loron 3 marsu “Hametin Unidade ba Dezenvolvimentu Nasionál”, ne’ebé sei partisipa veteran sira hosi munisípiu 13 inklui Rejiaun Administrativu Espesiál Oé-Cusse no Ambeno (RAEOA).
Governu iha obrigasaun dever hodi valoriza veteranu tuir konstituisaun RDTL Artigu 11. (Fó valór ba Rezisténsia) iha pontu haat mak dahuluk Repúblika Demokrátika Timór-Leste rekoñese no fó valór ba povu Maubere nia rezisténsia tinan atus ba atus hasoru dominasaun hosi railiur no mós ba sira hotu ne’ebé fó kontribuisaun hodi luta ba independénsia nasionál
Daruak, Estadu rekoñese no valoriza Uma-Kreda Katólika nia partisipasaun iha prosesu ba libertasaun nasionál Timór-Leste nian.
Datoluk, Estadu asegura protesaun espesiál ba mutiladu funu nian, oan-kiak no mós sira seluk tan ne’ebé fó-an tomak ba luta independénsia no soberania nasionál nian, no proteje mós sira hotu ne’ebé partisipa ona iha Rezisténsia hodi hasoru okupasaun hosi raiseluk, tuir lei haruka.
Ikus liu, Lei maka define kona-ba mekanizmu atu fó omenajen ba asuwa’in nasionál sira.
Governu konstrui uma veteran 20
Nia afirma, tuir dadus daudaun ne’e Governu konstrui hotu uma ba Veteranu husi tinan 20 to’o 24 iha hamutuk 20.
“Subsídiu Governu konstrui uma ba veteranu husi tinan 20 to’o 24, iha munisípiu Viqueque hetan uma 20, husi uma 20 konstrui hotu. Ba oin Governu presiza haree fali veteranu grau 15 ate 19 hodi konstrui uma ba sira, maibé Governu maka bele deside,” nia akresenta.
Resposavél ne’e hatutan tan kona-ba, verifikasaun dadus veteranu 2009 husi munisípiu Viqueque hamutuk 3.000, maibé to’o agora seidauk iha rezultadu.
“Ha’u analiza seidauk fó sai rezultadu verifika dadus veteranu 2009 ne’e dala ruma husi orsamentu tanba ne’e maka to’o agora Governu seidauk públika sai rezultadu dadús. Tanba buat hotu deternina husi orsamentu, bainhira osan laiha ita book an mós labele”, nia konsidera.
Polítika Governu nian fó bolsu estudu ba veteranu nia-oan sira, nune’e foin lalais veteranu no martir sira-nia oan foti formulariu hodi rejista, maibé to’o agora seidauk hetan bolsa estudu.
“Ha’u haree dadús veteranu Viqueque ninia oan foin ida rua maka hetan, foin lalais barak mai rejista maibé naran seidauk sai to’o agora. Maske Governu kria hotu bolsu estudu ba veteranu nia oan sira. Ha’u hanoin veteranu ninia oan merese asesu ba bolsu estudu sira-ne’e tanba nasaun ne’e hari’i veteranu maka hari’i”, katak.
Jornalista :Vitorino Lopes da Costa
Editór : Florencio Miranda Ximenes
