Autoridade lokál sira presiza organiza komunidade partisipa edukasaun votante
BOBONARO, 24 fevereiru 2023 (TATOLI) – Diretór Sekretariadu Tékniku Administrasaun Eleitorál (STAE), munisípiu Bobonaro, Mariano Viegas Amarál, hateten autoridade lokál sira hanesan xefe suku no xefe aldeia sira presiza organiza komunidade sira atu partisipa atividade edukasaun votante nune’e evita votu nulu iha eleisaun parlamentár.
Nia hato’o apelu ne’e tanba iha eleisaun prezidensiál tinan kotuk STAE esforsu-aan hakbesik ho maneira oinoin ba aldeia no suku sira, maibé iha komunidade barak mak lakohi partisipa hodi rona informasaun kona-bá lala’ok eleisaun, oinsá vota ho loloos.
Notísia relevante: STAE Bobonaro identifika estrada ba sentru votasaun 36 presiza hadi’a
“Ami husu tulun ba administradór postu no xefe suku sira, kuandu STAE ba halo edukasaun votante karik, bolu sira mai rona netik ba, oras ida ka oras rua hanesan ne’e nune’e komprende didi’ak, nune’e vota ho loloos,” Diretór STAE Bobonaro aprezenta asuntu ne’e iha reuniaun konsellu koordensaun munispál, kinta ne’e.
Nia dehan, edukasaun votante ne’e importante tebes autoridade lokál sira organiza komunidade tuir atividade refere, tanba iha eperiénsia tinan kotuk akontese votu nulu barak, polítiku sira maioria fó todan fali ba STAE no Komisaun Nasionál das Eleisaun (CNE, sigla portugés) mak la halo atividade edukasaun votante ba eleitór sira ho másimu.
Miabé diretór Mariano esklarese, STAE no CNE fasilita de’it prosesu eleisaun hahú to’o remata, tanba atu eduka votante sira la’óss reponsablidade órgaun eleitorál nian mesak de’it.
“Polítiku sira mós tenke hanorin ninia votante hatene vota ho loloos, tanba buat ida fahe kadeira iha parlamentu ne’e bazea ba votu válidu ne’e, la’ós bazea ba totál eleitór,” nia fó hanoin ba partidu polítiku sira.
Iha fatin hanesan, Administradór postu administrativu Atabae, munisípiu Bobonaro, Lino Tavares, rekoñese komunidade sira barak la partisipa duni tanba STAE no CNE la halo koordensaun servisu ho autoridade postu.
Maske nune’e, Lino Tavares akresenta iha eleisaun lejizlativa tinan ne’e autoridade postu ho lideransa komunitária sira iha postu Atabae prontu apoia másimu ba kualkér atividade ne’ebé STAE no CNE planu atu realiza.
“Ha’u sujere ba diretór STAE, karik iha tempu oin mai ne’e ita-boot sira planu iha, ha’u prontu atu apoiu no kolabora ho ita-boot sira,” nia katak.
Enkuantu tuir dadus hosi STAE totál eleitór ne’ebé ezerse direitu votu iha eleisaun prezidensiál iha Bobonaro na’in-52.499 inklui sentru votasaun paralelu na’in-379 hosi totál eleitór 70.311, votu nulu 408 (0,78%), votu reklamadu 45 (0,09%), rezeitadu sia (0,02%), branku 130 (0,25%), nune’e totál votu válidu 51.907 (98,87%).
Notísia relevante: STAE Bobonaro identifika estrada ba sentru votasaun 36 presiza hadi’a
Jornalista : Sérgio da Cruz
Editór : Evaristo Soares Martins
