Estoke aimoruk item 59 mamuk iha SSMM
DILI, 24 fevereiru 2023(TATOLI) – Diretór Servisu Saúde Munisípiu Manatutu (SSMM), Mateus Vicente Correia, hateten estoke aimoruk mamuk hamutuk item 59 iha fasilidade saúde sira iha Manatutu.
‘’Ami Munisípiu Manatuto ho totál aimoruk item hamutuk 262 husi ne’e item 59 mak mamuk”, Mateus Vicente Correia, informa iha salaun Mahoka, sesta ohin.
Nia dehan, husi estoke aimoruk 59 ne’e hanesan aimoruk esensiál sira hanesan parcetamol, amoxilin, promethazin no mós aimoruk sira ne’ebé mak durante ne’e iha. Ho situasaun sira ne’e, pesoál saúde sira tenke halo sira nia maneira, dala ruma aimoruk ne’ebé mak sira fó iha loron 15 nian, maibé tanba estoke aimoruk limitadu, entaun sira fó de’it loron 10 nian, atu lori hein aimoruk ne’e bele tama fali.
“Maibé parte balun, ezemplu hanesan ema ne’e mai ho moras komplikasaun ka isin manas, maibé parcetamol laiha entaun ami tenke buka meius oinsá fó fali aimoruk ibuprofen hodi responde ba nia situsaun hodi hein aimoruk bele tama, ho esforsu ida ne’e la’o nafatin no pedidu esensiál reguler no emerjénsia la’o nafatin mai iha nasionál hodi hein aimoruk tama mai”, nia esplika.
Nia dehan, durante ne’e pedidu halo nafatin maibé konforme estoke aimoruk iha nasionál, bainhira estoke laiha, entaun sira labele halo distribuisaun.
Iha fatin hanesan, Diretór Servisu Saúde Munisípiu Ermera, Joni Alves dos Santos, informa estoke aimoruk iha Munisípiu Ermera durante ne’e iha 72 item husi ne’e 11 mak mamuk.
“Agora daudaun, ita nian estoke aimoruk mamuk ne’e iha 11 item, entaun ita bele halo atendimentu ba populasaun sira ne’ebé mak moras”, Joni dehan.
Jornalista : Felicidade Ximenes
Editór : Zezito Silva
