Governu Japaun apoia karreta ba Bombeiru Baucau atua inséndiu
BAUCAU, 24 fevereiru 2023 (TATOLI) – Governu Japaun apoia karreta ida ba Autoridade Protesaun Sivíl Munisípiu Baucau liuhosi diresaun Bombeiru nune’e atua kazu inséndiu.
Komandante Autoridade Protesaun Sivíl Munisípiu Baucau, Inspetór Polísia, Aleixo Ximenes, esplika, apoia refere to’o iha loron-21 fevereiru ho funsaun atua dezastre naturál hanesan inséndiu iha munisípiu Baucau.
“Agora ekipa Bombeiru hahú haree atu iha koñesimentu ba sasán sira nune’e sei kontinua treinu konjunta kona-bá utilizasaun sasán hosi karreta ne’e,” Komandante Autoridade Protesaun Sivíl hateten iha Vila Antiga, sesta ne’e.
Autoridade Protesaun Sivil Baucau bainhira simu karreta hosi nasionál motorista na’in-tolu hosi diresaun Bombeiru Baucau mak hetan uluk formasaun, tanba ne’e iha tempu badak sei kontinua fó formasaun hosi profisionál ba ekipa hotu nune’e ba futuru bele utiliza ho kuidadu.
Sistema serbisu karreta refere hanesan hafoin simu bee hosi tanki, bee sei halo karrega iha karreta refere antes fó-sai bee ba objetu ahi ne’ebé lakan ho másimu, ho distánsia metru 50 nune’e presiza pesoál ho fíziku di’ak hodi satan bee hosi mangeira.
“Ba oin bainhira ekipamentu hanesan ne’e presiza halo rekrutamentu ba joven ho fíziku di’ak nune’e kaer mangeira,” Inspetór Polísia Aleixo Ximenes akresenta.
Ekipamentu ne’ebé fasilita hosi karreta refere hamutuk item 49 komposta hosi kabiasu, machado forte, trianglu sinál tránzitu, makaku, lona, jeradór, lampu sorot, kapasete, gerobak tula mangeira, ponte mangeira boraixa no seluk tán.
Ho apoia ne’e fasilita ona Bombeiru Baucau, maske seidauk sufisiente tanba munisípiu Baucau geografiamente luan kompostu postu admistrativu neen ne’ebé ekipamentu karreta tanki foin ida no sei presiza karreta rua hanesan tanki rega nian no fornesementu bee nian ida.
Autoridade Protesaun Sivíl Munisípiu Baucau rejista funsionáriu hamutuk 145 ne’ebé parte diresaun Bombeiru Baucau hamutuk finsionáriu na’in-26.
Jornalista : Natalino Belo
Editór : Evaristo Soares Martins
