Júlio Mak troka Eurico da Rosa lidera CCI-TL Oé-Cusse
OÉ-CUSSE 23 fevereiru 2023 (TATOLI) – Kongresista na-in-51 fó konfiansa ba Júlio Mak lidera Kámara Komérsiu Indústria Timor-Leste (CCI-TL, sigla portugés) iha Rejiaun Administrativa Espesiál Oé-cusse Ambeno (RAEOA), bodi troka Eurico da Rosa.
Konferénsia datoluk CCI-TL RAEOA ne’e hatudu katak, Diretór Kompañia Irmão Timor Unipesoál Lda, Júlio Mak eleitu ba Prezidente hodi lidera CCI-TL iha Rejiaun Administrativa Espesiál Oé-Cusse Ambeno (RAEOA) troka Prezidente sesante, Diretór kompañia Am-Lisu Unipesoál Lda, Eurico da Rosa.
Prezidente sesante, asume kargu CCI-TL iha Oé-Cusse dezde 2018 no termina iha fevereiru 2023, liuhosi konferénsia datoluk ne’ebé realiza iha otél Ambeno Oé-Cusse, kinta ne’e.
Konferénsia datoluk ne’e partisipa hosi kongresista na’in-51 avansa ho pakote rua, liuhosi eleisaun sekreta, no iha rezultadu ikus hosi eleisaun ne’e pakote I lidera hosi Prezidente CCI sesante, Eurico da Rosa hetan votu 21, pakote II lidera hosi Júlio Mak ho votu 31 no votu nulu ualu (8).
Nune’e rezultadu ikus hosi konferénsia datoluk ba estrutura CCI Oé-Cusse, Júlio Mak asume kna’ar nu’udar Prezidente hodi lidera CCI RAEOA hamutuk ho estrutura no departamentu sira ho mandatu tinan haat, 2023 to’o 2027.
Prezidente CCI-TL iha Oé-Cusse eleitu, Júlio Mak promete sei hadi’a sistema anteriór ne’ebé naksalak, hodi servisu hamutuk ho asosiasaun atividade ekonomia sira hodi integra hamutuk ho Servisu Rejistrasaun no Verifikasaun Emprezariál, Institutu Públiku (SERVE IP) sukursál Oé-Cusse
“Obrigadu, ba fiar ne’ebé fó mai ha’u, hanesan Prezidente CCI ba dala tolu iha RAEOA liuhosi konferénsia ba períodu tinan haat, hosi ami-nia ekipa sei halo enkontru hodi forma estrutura foun, halo servisu, ami atu hadi’a sistema iha RAEOA, no sei rejista dadus komesa hosi kioske, loja, ristaurante no kompañia boot atu servisu hamutuk ho CCI Oé-Cusse, tanba ita tenke la’o hamutuk ho SERVE.IP hodi rekolla preokupasaun saida mak akontese eiha Oé-Cusse, liuliu ba atividade ekonómiku nian,” Júlio ko’alia iha otél Oé-Upun.
Júlio orgullu no agradese ba Prezidente CCI sesante ho estrutura tomak, tanba durante mandatu konsege hala’o ona servisu balu, nune’e iha mandatu datoluk ne’e sei kontinua no hadi’a atu armoniza CCI-TL iha Oé-Cusse la’o ba oin.
Iha biban ne’e, Prezidente CCI sesante, Eurico da Rosa, agradese ba estrutura foun, tanba konferénsia datoluk ne’e realiza tanba ezijénsia hosi nasionál atu halo re-estruturasaun iha munisipíu hotu-hotu inklui RAEOA, liuliu ba atendimentu nesesidade emprezáriu nian.
“Hanesan organizasaun ida ho nia rejimentu, kada tinan haat tenke halo nia konferénsia, hodi hili fali nia lrezidente no estrutura foun hodi kontinua vizaun no misaun CCI nian, tanba ne’e ohin loron ita hamutuk iha fatin ne’e konsege realiza konferénsia ba dala tolu RAEOA, nu’udar Prezidente CCI sesante, espera ba futuru ita hamutuk kolabora no serbisu hamutuk lori CCI ba futuru nia di’ak hametin relasaun ho Autoridade no parsériu sira hodi kontribui ba dezenvolvimentu ekonómiku iha Oé-Cusse,” nia agradese.
Entretantu, durante konferénsia CCI-TL datoluk iha RAEOA, lidera hosi Prezidente meza, Frederico Teixeira, Prezidente Konsellu Fiskál, Francisco Katu, Vise-Primeiru, Tomás Tamele, Vise-segundu, Esperansa da Costa, Sekretáriu Tékniku, Lourenço Kaunan no Adelaide da Costa.
Tuir dadus atuál CCI-TL iha Oé-Cusse emprezáriu hamutuk 600-resin, komposta hosi asosiasaun atividade ekonómiku, emprezáriu individu mai hosi sub-rejiaun haat iha territóriu Oé-Cusse.
Jornalista: Abílio Elo Nini
Editór: Evaristo Soares Martins
