Kalbuady hala’o abertura Tasa Avo Nana iha Covalima
COVALIMA, 24 fevereiru 2023 (TATOLI)–Prezidente Komité Olimpíku Timor-Leste (TL), Francisco Calbuady Lay, sesta ne’e, hala’o abertura ba Tasa Avo Nana, iha kampu Ladi, suku Camnasa, postu administrativu Suai, munisípiu Covalima.
Tasa Avo Nana iha tinan 2023 ne’e, ho nia tema “Hametin Fraternidade Umana liuhosi Asaun Desportiva Xanana Cup” tanba futeból ne’e laiha fronteira, la haree ba rasa no kór, tanba futeból ne’e ba ema hotu-hotu.
“Tasa Avo Nana Cup ne’e hahú ona iha munisípiu Dili, Ermera no Maliana, ohin hahú abertura iha Suai. Iha futeból ne’e laiha fronteira , la haree ba rasa no kór, tanba futeból ne’e ba ema hotu-hotu no ema hotu-hotu bele joga,” Prezidente Komité Olimpíku Timor-Leste, Francisco Kalbuady Lay, hateten liuhosi diskursu iha seriimónia abertura Avo Nana CUP, iha kampu Ladi, Covalima.
Nia hatutan, hanesan joven kria amizade tenke hadomi malu, kria estabilidade no pás, joga la’ós atu buka manán de’it maibé lakon labele hirus malu, tanba imporante mak kria amizade entre joven sira no jogo di’ak atu adeptu sira bele haree.
Tasa Avo Nana ne’e sei fó primeiru ba manán-na’in sira hanesan vensedór dahuluk entrega tasa hanesan $1000, sai vensedór daruak sei fó prémiu $750.00 no vensedór datoluk sei simu osan $500.
Prezidente Komisaun Organizadora Tasa Avo Nana iha Covalima, Saul Amarál, hateten atu hala’o jogu tasa Avo Nana hahú halo preparasaun iha fulan dezembru 2022 to’o ohin loron halo abertura.
“Tasa Avo Nana ho Objetivu ita hakarak anima komunidade iha Covalima moris iha pás, ne’ebé ho tipu komunitária ho tasa permanente,” nia dehan.
Tasa Avo Nana ne’e, hala’o durante fulan ida-nia laran hahú hosi loron 24 fevereiru 2023 to’o loron 30 marsu 2023.
Administradór posto administrativu Suai, Luzino do Rego, hateten autoridade lokál prontu atu kolabora no apoiu hodi dezenvolve desportu di’ak liután iha munisípiu Covalima.
“Autoridade lokál atu dezenvolve desportu iha munisípiu Covalima ita laiha rezerva, ita prontu kolabora no apoiu atu bele dezenvolve ita-nia desportu no Covalima bele dezenvolve lais no di’ak liután,” nia dehan.
Maske iha covalima iha limitasaun fasilidade desportu no seidauk iha mini estadiun hodi prenxe kritéria hanesan ho munisípiu sira seluk, maibé joven sira iha vontade makaas atu inklinia-an desportu foteból.
Klubu ne’ebé mak partisipa iha jogu tasa Avo Nana ne’e mak hanesan klubu Juventude, Hosana, Salore, B Baboras, F.C RN, Aikameli, Lolowa, Perdidu, Levanta, Kafora, Fatululik, FC Kejao, FC Samore, FC Rariak, Haliber, Sasulis, Lafaek, Broça, Ferin, Orun, Ramahana, Sato, Maudemo, Wetado, Haburas, Busakukun, Fosora, Sanety, Perjowa no Jamako.
Jornalista : Celestina Teles
Editór : Cancio Ximenes
