KHUNTO utiliza subvensaun tuir matadalan hosi CNE
DILI, 24 fevereiru 2023 (TATOLI)—Vise Prezidente Partidu Kmanek Haburas Unidade Nasionál Timoroan (KHUNTO), Nicolau Freitas, hateten subvensaun ba partidu politiku ne’ebé partidu KHUNTO hetan hosi Governu ne’e ninia ezekusaun tuir matadalan no manuál hosi Komisaun Nasionál Eleisaun (CNE, siglá portugés).
Notísia Relevante: CNE apresia relatóriu subvensaun públika hosi partidu asentu parlamentár
“Utilizasaun iha regra tuir manuál CNE nian, tanba utilizasaun ba ida-ne’e ita sempre la’o tuir prosesu ne’ebé iha. Foin daudaun subvensaun ne’e partidu KHUNTO nia relatóriu di’ak tebe-tebes, ne’ebé hetan apresiasaun hosi hosi parte Komisaun Nasionál Eleisaun,” Nicolau Freitas hateten liuhosi konferénsia imprensa ba jornalista sira iha Manleuana, sesta ne’e.
Mezmu nune’e, nia la esplika detallu kona-ba utilizasaun ne’e ba saida-saida de’it, maibé partidu sempre utiliza tuir manuál CNE hodi halo formasaun polítika ne’ebé iha nafatin garante transparánsia.
“Utilizasaun subvensaun públiku ne’ebé liu-liu ezekusaun ne’e ezekuta tuir manuál, tanba buat hotu submensaun ne’e utiliza ba formasaun polítika no nafatin garante la’o tuir prosesu tomak ne’ebé iha,” nia dehan.
Tan ne’e, nia hatutan, CNE iha matadalan bainhira iha buat ruma sempre haruka ka komunika hodi konsulta ho dirasaun partidu nian, ba kestaun asuntu tékniku ne’ebé sempre iha komunikasaun hosi CNE mai iha partidu hodi halo relatóriu ba asuntu tékniku ruma ladún klaru.
Nicolau Freitas, la lembra montante orsamentu hira mak CNE atribui ba partidu KHUNTO ne’ebé hetan kadeira lima iha Parlamentu Nasionál liuhosi subvensaun públika ne’e.
‘’Tuir porsentu ne’ebé iha kadeira lima tuir ida-ne’e,” nia dehan.
Aleinde ne’e, Vise Prezidente Patidu KHUNTO ne’e apela ba estrutura nasionál to’o iha nivel aldeia, militante no simpatizante ne’ebé hamahan an iha partidu KHUNTO atu kontinua serbisu makaas hodi fó vitória ba iha eleisaun parlamentár 2023.
Tuir nia, estrutura partidu mós agora foku óinsa preparasaun hodi hasoru prosesu tomak no tempu badak ba aprezenta kandidatu iha Tribunál Rekursu.
Entretantu, Vise Prezidente Partidu KHUNTO, Nicolau Freitas ho estrutura partidu, sesta ne’e, iha rezidénsia Konsilleiru Másimu Partidu KHUNTO, José dos Santos Naimori Bukar, iha Manleuana, halo konferénsia imprensa hodi hato’o klarifikasaun hatán kona-ba Atuál Sekretáriu Partidu KHUNTO no atuál Ministru Transporte no Komunikasaun (MTK), José Agostinho, ninia deklarasaun ne’ebé fó sai kona-ba utilizasaun subvensaun públika iha partidu nian.
Notísia Relevante: Partidu polítiku koopera di’ak ho CNE kona-ba subvensaun públika
Jornalista : Nelson de Sousa
Editór : Cancio Ximenes
