OÉ-CUSSE 24 fevereiru 2023 (TATOLI) – Membru Polísia Nasionál Timor-Leste (PNTL) na’in-12 iha Komandu Rejiaun Administrativa Espesiál Oé-Cusse Ambeno (RAEOA), daudaun ne’e idade tama ona reforma iha 2023.
Adjuntu Komandante PNTL Oé-Cusse, Asistente Nicolau Francelino da Costa, informa, membru na’in-12 ne’e simu ona formasaun reforma nian hosi komandu jerál bazea lei orgánika PNTL nian.
“Foin daudaun ne’e ita-nia ekipa ida hosi nasionál mai hosi Komandu Pesoál Informasaun hamutuk ho Gabinete Asuntu Jurídiku, mai sosializa kona-bá lei organika foun nú.55/2022, liga mós ba asuntu reforma ninian, tanba Oé-Cusse na’in-12 maka tama ona idade reforma,” Nicolau Francelino da Costa, informa ba Agência Tatoli iha Oé-Cusse, sesta ne’e.
Adjuntu Komandante PNTL Oé-Cusse ne’e, informa, totál lista reforma ne’ebé maka alista iha territóriu nasionál hamutuk na’in-228, inklui RAEOA na’in-12, ne’ebé sira preparadu atu tama idade reforma..
“Maibé molok sira integra iha reforsa, sira sei prienxe asuntu balu hosi Komandu Jerál, sira na’in-12 iha Oé-Cusse hein hela formatu ida atu prienxe ba prosesu reforma ninian hosi komandu pesoál formasaun nasionál,” nia katak.
Tuir nia, bainhira membru na’in-12 hakotu ona relasaun servisu iha Instituisaun PNTL, afeta mós ba komandu PNTL Oé-Cusse, tanba sei enfrenta menus rekursu umanu, nune’e nia espera iha futuru Governu no Estadu bele konsidera hodi halo prosesu rekrutamentu foun.
Jornalista: Abílio Elo Nini
Editór: Evaristo Soares Martins
