MJ komunika ona Empreza Internasionál rezolve problema kaderneta passaporte
DILI, 24 fevereiru 2023 (TATOLI) – Ministru Justisa (MJ) Tiago Sarmento, halo ona komunikasaun ho kompañia Internasionál Tales hosi Finlandia, atu bele rezolve lalais problema kaderneta passaporte iha tempu badak.
“Semana rua kotuk liubá reprezentante hosi kompañia internasionál Tales, mai ona iha Ministériu Justisa no sira koalia ona ho ha’u katak sira prontu atu prodús kaderneta passaporte iha tempu badak”, Tiago Sarmento ba jornalista sira iha edifísiu CNE Colmera, sesta ne’e.
Governante ne’e dehan, MJ prevé ona orsamentu hosi Orsamentu Jerál Estadu tinan 2023 ho montante tuir produsaun kaderneta pasaporte.
“Sira (kompañia Tales) promete atu prodúz kaderneta passaporte hamutuk 80.000, depende ba sira produsaun mak ita haree maibé orasamentu ba ida ne’e ita prevé ona”, nia dehan.
Nia esplika, prosesu produsaun ba kaderneta passaporte, lori tempu ne’ebé naruk oituan, tanba produsaun sei halo iha Franca no sei hetan mós sertifikasaun hosi International Civil Aviation Organization (ICAO).
Tanba seguransa no kualidade ba passaporte, ICAO mak responsabliza ba passaporte hotu liuliu ba nasaun sira ne’ebé memebru ICAO nian no Timor-Leste nu’udar membru ICAO tenke submete prosesu ida ne’e.
“Ita iha devér atu halo tuir regulamentu sira ne’ebé ICAO fó mai. Entaun ita-nia passaporte iha hela prosesu nia-laran, lakleur tán mai ona”,Tiago Sarmento esplika.
Tanba ne’e, ezekutivu ne’e husu ba sidadaun sira atu pasiénsia oituan.
“Pasiénsia oituan, fulan ida ka fulan rua nia-laran kaderneta passaporte sei mai”, nia adianta.
Governante ne’e rekoñese kaderneta passaporte agora dadaun sai problema ba ema hotu iha tinan ida ne’e.
Nia rekorda 2021, Governu la prevé iha Orsamentu Jerál Estadu 2022, iha Diresaun Jerál Servisu Rejistu Notariadu Ministeriu Justisa atu halo akizisaun ba kaderneta passaporte.
Maske nune’e, Ministériu Justisa loke konkursu iha 2022 maibé laiha kompañia ida mak konkore atu ba halo produsaun kaderneta passaporte.
“Maibé tinan ne’e ho mudansa lei aprovizionamentu bele fó dalan ba ha’u atu haree hodi ita bele rezolve kestaun ne’e ”, ministru konklui.
Jornalista: Natalino Costa
Editór : Zezitto Silva
