PNDS sensibiliza matadalan operasaun manuál ba autoridade Covalima
COVALIMA, 24 fevereiru 2023 (TATOLI)—Xefe Departamentu Komunikasaun Sekretáriu Tékniku PNDS Nasionàl, Pedro Cachola, hateten ekipa Programa Nasionál Dezenvolvimentu Suku (PNDS) Nasionál hala’o sensibilizaun matadalan operasaun manuál ba autoridade sira iha munisípiu Covalima.
“Ohin, halo sensibilizasaun atu habelar informasaun liu-liu programa manuál PNDS, tanba iha programa ne’e rasik ita halo ona revizun dahuluk programa operasaun manuál ba autoridade lokál sira iha munisípiu Covalima,” Xefe Departamentu Komunikasaun Sekretáriu Tékniku PNDS Nasionàl, Pedro Cachola, hateten jornalista sira iha salaun AMC, Sukaer Laran, sesta ne’e.
PNDS halo revizaun bazea ba dekretu-lei númeru 8/2013, 26 juñu, hodi ko’alia kona-ba prinsípiu implementasaun programa PNDS.
Iha tinan 2023 ne’e, Governu liuhosi Ministériu Administrasaun Estatál (MAE) hamutuk ho asesór internasionál sira hamosu dekretu-lei númeru 94/2022, 28 dezembru, halo alterasaun dahaat manuál PNDS nian,
Governu halo revizaun dahuluk ba matadalan PNDS programa operasaun manuál ne’ebé hahú 2013, ho nune’e iha tinan 2023 foin halo revizaun ba matadalan ne’e rasik.
“Ita presiza halo revizaun matadalan tanba ita akumula hotu durante 2013 PNDS hahú la’o faze normal. Tanba, ita hetan kritíka rekomendasaun barak programa PNDS direta ba komunidade. Hafoin ne’e, ita akumula hamutuk hodi halo revizaun bazea sira-nia rekomendasaun,” nia dehan.
Revizaun Matadalan haree ba kna’ar-sira hanesan lia-fuan akronimu livru ba programa operasaun ba manuál rasik , mekanismu identifika benefisiáriu-sira no fundu aloka ba nivél suku no aldeia sira no hodi ko’alia mós kona-ba UNP rasik.
“Tinan kotuk UKL transforma ona ba UNP bazea ba dekretu-lei númeru 94/2022. Ita kria matadalan operasaun hamutuk programa PNDS regular, ita mai halo sensibilizasaun nivél munisípiu no suku sira,” nia dehan.
Administradór munisípiu Covalima, Francisco de Andrade, hateten sensibilizasaun matadalan PNDS ba autoridade Covalima ho razaun tanba halo ona revizaun ba matadalan anterior.
“Ohin, atu halo sensibilizasaun Matadalan signifika iha buat ne’ebè foun, ita seidauk hatene. Tanba, loron di’akoOhin konvida xefe xuku, administradór postu administradór sira-ne’ebè tama iha ekipa PNDS, rona rasik bainhira iha aprezentasaun,” nia dehan.
Ho sensibilizasaun ida-ne’e, ida-idak bele hatene nia tarefa servisu hanesan ba xefe suku, administradór postu administrativu, administradór sira tanba aloka orsamentu ba PNDS ba munisípiu Covalima kuaze millaun $6 ne’ebé aloka ba to’o suku hotu.
Orsamentu ba programa Uma Naroman ba Povu (UNP) rihun $1.55 ne’e seidauk konta ho apoiu hosi Governu Austrália $297,263 no ba hotu UNP ho osan rihun 4.647.
Jornalista : Celestina Teles
Editór : Cancio Ximenes
