VIQUEQUE, 24 fevereiru 2023 (TATOLI)- Xefe Sentru Saúde, Postu Uatulari, Munisípiu Viqueque, Valente Soares da Silva, informa daudaun sentru saúde Uatulari, Munisípiu Viqueque menus estoke ai-moruk tipu tolu.
“Daudaun, ami ai-moruk tipu tolu maka estoke menus hanesan anti pedantic, anti Biotic no analgetic. Nune’e husu ba ministériu relevante atu distribui ai-moruk hodi fó atendimentu ba ita-nia pasiente sira-ne’ebé presiza”, hateten Valente Soares da Silva, ba jornalista sira, iha setru saúde Uatulari, sesta ne’e.
Xefe sentru saúde ne’e esplika, hahú husi janeiru to’o fevereiru estoke ai-moruk Analgetic fó tratamentu ba pasiente sira rejista isin moras, ulun moras, ruin moras, ai-moruk antipathic atende ba pasiente sira-ne’ebé kazu isin manas no antibiotic ba tratamentu kanek no mear.
“Ami presiza tebes ai-moruk tipu tolu ne’e hodi bele fó tratamentu ba pasiénte sira-ne’ebé rejista kazu isin manas, mear no kanek sira-ne’e”, nia afirma.
Sentru Saúde Uatulari postu saúde na’in-12, nune’e ai-moruk distribui mai sentru hamutuk tipu 1.000 hodi fahe postu entaun iha sentru ai-moruk menus tanba ne’e ai-moruk maka la sufisente liu.
Hahú janeiru to’o fulan fevereiru, sentru ne’e rejista kazu moras Inspesaun Respiratoriu Aguda (ISPA) hamutuk na’in-130 no kazu dengue na’in-ida iha sentru saúde Uatulari.
Alende ne’e, Pesoál saúde iha sentru Uatulari na’in-64 ne’ebé sei ativu hodi fó atendimentu ba pasiente sira.
Jornalista: Vitorino Lopes da Costa
Editór : Florencio Miranda Ximenes
