Autoridade Covalima husu administradór postu kontrola servisu pontualidade funsionáriu PNDS
COVALIMA, 25 fevereiru 2023 (TATOLI)–Administradór munisípiu Covalima, Francisco de Andrade, husu ba administradór postu administrativu sira atu kontrola servisu pontualidade ekipa tékniku Programa Nasionál Dezenvolvimentu Suku (PNDS) destakadu iha postu administrativu sira.
“Ha’u apela liu-liu iha kolokasaun funsionáriu PNDS destaka iha postu administrativu sira-nia lista prezensa ba iha administradór postu administrativu atu kontrola sira-nia pontualidade servisu dala ruma ha’u tun halo monitorizasaun Uma Naroman ba Povu (UNP) husu funsionáriu seidauk iha,” Administradór Munisípiu Covalima, Francisco de Andrade, hateten ba jornalista-sira iha salaun AMC, Sukaer Laran, sesta ne’e.
Autoridade Covalima husu administradór postu administrativu sira atu kontrola servisu funsionáriu PNDS destakadu iha Covalima, ho razaun katak durante nia tun ba terrenu halo fiskalizasaun UNP, husu funsionáriu seidauk tama servisu no iha fulan marsu mós nia sei tun ba terrenu hodi halo fiskalizasaun konstrusaun UNP.
“Ha’u iha fulan-marsu tinan ne’e, ha’u tun ba suku hotu atu haree konstrusaun UNP ida-ne’e. Se bainhira funsionáriu servisu tenke ho pontualidade labele mai tuir ita-nia vontade, antes buka servisu Estadu nunka buka temi ita ida-idak mak buka servisu,” nia dehan.
Tanba ne’e, funsionáriu sira tenke sai servidór ida-ne’ebé di’ak ba povu nune’e konstrusaun UNP tolu de’it foin lalais finaliza iha fulan-dezembru 2021, maibé fevereiru 2022 mak foin finaliza ida-ne’e erru boot ida.
“Xefe suku, administradór postu administrativu sira, ita ida-idak iha ona ita-nia kna’ar kontrola sira, labele husik ita hotu servidór ne’e atu fó moris ita-nia povu servisu, labele mai haree liu oras seidauk to’o ita fila ona,” nia apela.
Diretór PNDS Covalima, Filipe Cardoso, klarifika administradór Covalima kestiona pontualidade servisu funsionáriu PNDS destakadu iha postu administrativu pertinente atu garante kalendáiru implementasaun programa PNDS .
“Ami halo intervensaun responsavél ba PNDS munisípiu iha loron 10 novembru 2021, ha’u prepara sirkulár ne’ebé administradór munisípiu aprova no asina ami haruka mós ba administradór postu administrativu hitu sira-nia intervensaun atu kontrola direta funsionáriu destakadu kada postu administrativu,” nia dehan.
Kada fulan, administradór postu aprova lista prezensa tenke kontrola sira-nia prezensa, karik falta tenke falta se lisensa tenke lisensa no sira mós tenke eziji relatóriu, prosesu implementasaun nivél postu, nune’e administradór sira apar andamentu implementasaun programa PNDS kada suku no postu administrativu.
Durante ne’e adminisradór postu administrativu sira relata servisu funsionáriu PNDS destakadu iha postu administrativu neen ho di’ak, maibé administradór postu administrativu Fohorem mak kestiona dixiplina servisu funsionáriu PNDS ba fasilitadór sosiál.
“Ha’u konsidera administradór Fohorem kestiona, ha’ u transfere ona mai iha munisípiu, Ha’u kontrola direta hodi atribui kna’ar ruma atu kontrola direta kona-ba nia pontualidade servisu,” nia hateten.
Durante ne’e, nia parte simu relatóriu hosi administradór postu administrativu neen (6) kona-ba servisu hosi funsionáriu PNDS destakadu iha postu administrativu neen (6) laiha moras no lisensa, maibé úniku administradór postu administradór Fohorem kestiona servisu pontualidade, hosi funsionáriu PNDS setór sosiál, destakadu postu Fohorem.
Tuir dadus hosi PNDS Covalima, konstrusaun UNP faze dahuluk konstrui UNP unidade 90 ne’ebe nia progresu 90,31% no faze daruak kontrui UNP unidade 278 ne’ebe nia progresu 10% ona.
Jornalista : Celestina Teles
Editór : Cancio Ximenes
