Governu inaugura sentru soru tais iha Suai Loro
COVALIMA, 25 fevereiru 2023 (TATOLI)–Governu liuhosi Ministériu Turizmu Komérsiu no Indústria (MTKI), sábadu ne’e, akompañadu hosi administradór Covalima, Francisco de Andrade, inaugura sentru soru tais iha aldeia Loo, suku Suai Loro, postu administrativu Suai, munisípiu Covalima.
Notísia Relevante: PM lansa rekuñesimentu “tais” sai patrimóniu kulturál mundiál
“Ohin iha ne’e, ita sai sasin ba serimónia inaugurasaun sentru soru tais dahuluk iha munisípiu Covalima, polítika VIII Governu konstituisionál oinsa atu diversifika setór produtivu turizmu Komersiu no Indústria,” Ministru Turizmu Komérsiu no Indústria, José Lucas do Carmo da Silva, hateten liuhosi nia diskursu iha aldeia Loo, suku Suai Loro.
Setór produtivu sira hanesan turizmu, ema artezenatu sira-nia kreatividade, presiza Governu atu trasa polítika tanba infraestrutura bázika hodi hamosu sentru tais, iha Suai Loro ida-ne’e parte importante ne’ebe mós parte hosi programa Governu.
“Oinsá atu fasilita inan-feton sira habiban an, setór artezenatu, setór soru tais nian, Governu presiza iha ita-boot sira-nia sorin hamosu fasilidade hodi fasilita ita-boot sira-nia kreatividade, maske iha polítika barak. Maibé la apoiu ho fasilidade ita sei la atinje objetivu ne’ebé ita trasa ona,” nia dehan.
Governu liuhosi Ministériu Komérsiu no Indústria liu-liu hosi dirasaun jerál turizmu nian hamosu atividade no identifika importánsia hosi fatin ida-ne’e, hodi hili suku Suai Loro konstrui sentru soru tais hodi bele fasilita inan-feton sira no maun-alin sira habiban an iha kreatividade artezenatu.
“Ho fasilidade ida-ne’e ita-boot sira sei organiza di’ak liután. La’ós maluk sira iha suku Suai Loro de’it maibé fasilidade ne’ebé Governu konstrui ba maluk hotu iha Covalima ne’ebé mak iha kreatividade ba tais,” nia hateten.
Tanba ne’e, nia husu atu jere didi’ak hodi bele akomula hotu-hotu nia interrese iha fasilidade ida-ne’e grupu no organizasaun kiik-sira tenke organiza an atu hola parte iha sentru soru tais,
“Governu sei nafatin halo promosaun sei lori ita-boot sira-nia produtu nivél nasionál no Internasionál ita-nia tais hetan rekoñesimentu no sai patrimóniu internasioná. Tanba ne’e oinsá mak servisu hodi halo produsaun barak no ho kualidade di’ak,” nia dehan.
Administradór munisípiu Covalima, Francisco de Andrade hato’o agardese ba Ministru Turizmu Komersiu Indústria tanba foin dahuluk kontrui, sentru soru tais iha suku Suai Loro iha munisípiu Covalima.
“Ha’u hato’o agardese ba Ministru Turizmu Komérsiu Indústria tanba foin dahuluk ita konstrui sentru soru tais iha suku Suai Loro,” nia dehan.
Governu konstrui sentru soru tais ho nia objetivu atu komunidade Suai Loro bele faan tais ne’ebé durante ne’e la lori ba Dili, maibé agora iha ona sentru soru tais nune’e bele faan tais iha sentru tais.
Nia hateten, aleinde promove tais Suai Loro nian no tais hosi fatin seluk mós bele promove sira-nia tais iha sentru soru tais, nune’e produtu tais bele sai ba nasionál to’o internasionál.
Administradór mós husu autoridade lokál atu kuidadu sentru soru tais iha Covalima atu labele estraga, nune’e bele uza ho tempu naruk.
Xefe Grupu Makerek Badaen, Romario Afonso de Fátima, haato’o agradesimentu ba Governu liu-liu Ministériu Turizmu Komérsiu no Indústria ne’ebé apoia ona grupu soru tais hodi konstrui sentru soru tais iha suku Suai Loro.
“Ha’u hato’o obrigada ba Ministru Turizmu no Indústria suporta ona ami-nia grupu sentru soru tais. Tanba ne’e, ha’u sei organiza ha’u-nia grupu sira hodi soru tais ho kaulidade ne’ebé di’akliu,” nia hateten.
Sentru soru tais iha Suai Loro, daudaun ne’e rejista ona grupu soru tais sira hanesan Grupu Makerek Badeen ho nia membru na’in-11, Laloran ho nia membru 13 no grupu Kaduta.
Notísia Relevante: PN aprova projetu rezolusaun “Loron Nasionál Tais” selebra kada 14 dezembru
Jornalista : Celestina Teles
Editór : Cancio Ximenes
