MTCI apoiu $40.000 harii gazebo 16 iha tasi-ibun Suai Loro
COVALIMA, 25 fevereiru 2023 (TATOLI)–Ministériu Turizmu Komérsiu no Indústria (MTCI, sigla portugés) apoiu fundu $40.000 ba grupu komunitária atu joven sira harii gazebo16 kompleta ho fasilidade iha tasi-ibun suku Suai Loro, postu administrativu Suai, munisípiu Covalima.
“Programa rekuperasaun ekonómia, iha fundu ida ita bolu naran pre, iha suku Suai Loro iha mós benefisiáriu, ita iha gazebo 16 ne’ebé joven sira harii iha tasi ibun, ne’ebé kompleta ho nia fasilidade hanesan sintina hodi apoiu fundu hamutuk $40.000,” Governante ne’e hateten ba jornalista sira iha suku Suai Loro, sábadu ne’e.
Prosesu apoiu fundu ne’e liuhosi grupu komunitáriu submete sira-nia proposta, ne’ebé prosesu durante fulan-neen (6) atu anúnsiu no halo sensibilizasaun no foin lalais dezembru 2022 ne’e mak sira hetan apoiu fundu hosi MTCI.
Governu apoiu fundu $40.000 ne’e la’ós fó dala ida, maibé apoiu ne’e atribui faziadamentu no bainhira sira haruka relatóriu progresu servisu mak foin bele apoiu tan fundu.
“Objetivu apoiu fundu hafoin COVID-19 iha perturbasaun ida-ne’e hanesan fundu ida atu estimula hafoin ita para tinan rua-resin ho inisiativa ida-ne’e atu estimula ba sira-nia atividade,” nia dehan.
Ho apoiu fundu ne’e, oras ne’e joven sira harii ona gazebo 16 iha tasi ibun Suai Loro, postu administrativu Suai, munisípiu Covalima ne’ebé kompleta ho fasilidade hanesan sintina ne’e liuhosi sira-nia kreatividade.
Tuir Agência Tatoli nia observasaun iha terrenu hatudu katak, joven-sira finaliza ona harii gazebo 16 no agora sei prosesu konstrusaun sintina, maske seidauk finaliza komunidade iha munisípiu Covalima no mós husi nasionál entuziasmu hodi vizita fatin turizmu komunitáriu iha tasi-ibun Suai Loro.
Jornalista : Celestina Teles
Editór : Cancio Ximenes
