Taur husu konfrensista servisu makaas ultrapasa dezafiu iha eleisaun parlamentár 2023
DILI, 25 fevereiru 2023 (TATOLI)–Prezidente Partidu Libertasaun Populár (PLP), Taur Matan Ruak, husu ba estrutura nasionál no munisipál sira atu iha kbiit servisu makaas hodi bele ultrapasa dezafiu todan iha eleisaun parlamentár ne’ebé sei akontese iha 21 maiu 2023.
Notísia Relevante: Prezidente Repúblika dekreta loron eleisaun Parlamentár iha 21 maiu
“Ha’u hanesan Prezidente, konferénsia ida-ne’e susesu, tanba servisu mai oin todan, dezafiu mai oin barak, ita tenke iha kbiit atu ultrapasa ba dezafiu sira-ne’e. Atu hatudu ba ita-nia inan-aman sira, oan sira katak ita bele,” Taur Matan Ruak hateten iha diskursu ba segunda konferénsia nasionál PLP nian ne’ebé hala’o iha Salaun Mahoka, Dili, sábadu ne’e.
Tanba ne’e, Taur husu ba kuadru hotu tenke servisu makaas atu hetan vitória iha eleisaun parlamentár ne’ebé sei akontese iha fulan-maiu ne’ebé mai ne’e.
“Ita tenke servisu makaas liután, ita la konta de’it ita-nia susesu, ita mós iha ita nia dezafiu. Ita la konta de’it ita-nia dezafiu maibé ita mós iha ita-nia susesu,” nia dehan.
Iha biban hanesan, Sekretariu Jerál Partidu Frente Revolucionaria do Timor-Leste Independente (FRETILIN), Marí Alkatiri, hateten konferénsia ne’e tenke sai ho susesu tomak.
“Susesu konferensia ida-ne’e, hanesan susesu plataforma nian tomak atu manán iha eleisaun ida mai ne’e,” Alkatiri hateten bainhira partisipa konferensia ne’e.
Iha biban ne’e, nia mós hato’o ba delegadu no konferesista sira katak plataforma ne’ebé partidu tolu halo sei metin ba oin to’o eleisaun ramata hodi kaer tan ukun dala ida tán.
“Plataforma ida-ne’e entre FRETILIN, PLP no Partidu Kmanek Haburas Unidade Nasionál Timoroan (KHUNTO) sei kontinua ba oin, agora no eleisaun ramata. FRETILIN garante plataforma ida-ne’e sei la nakdoko, hamutuk hateke ba oin hodi ba ukun iha tinan lima tan,” nia hateten.
Nia hatutan, plataforma ne’e sai hanesan baze ba inkluzaun maiór ne’ebé sei akontese bainhira eleisaun ramata.
“Jeneral Taur, bou Naimori konkorda ho ha’u kona-ba plataforma ida-ne’e, ita tenke hakuak ema hotu,”nia hateten.
Nia haklaken, bainhira plataforma ne’e manán iha eleisaun povu mak sei manán iha 2023 ba oin, tanba sei kontinua tan programa prioridade hirak ne’ebé durante ne’e hala’o ona.
Programa prioridade hirak ne’e mak hanesan Cesta Bazika, Uma Naroman ba Potu (UNP), subsidiu ba kada uma kain no programa importante seluk tan ne’ebé fó benefisiu ba povu.
Prezidente Komisáriu Polítika Nasionál (CPN-sigla portugés) Partidu Demokratiku (PD), Adriano Nacimento, hateten PD sempre tau konfiansa ba PLP no fiar katak konferénsia ne’ebé hala’o sei susesu.
“PD sempre tau konfiansa, esperansa ba PLP ba partidu hotu atu tuur hamutuk ko’alia, hatuur ita-nia partidu sai komprimentu ida hadi’a nasaun no povu ida-ne’e nia moris, susesu ba konferénsia ne’e,” nia dehan.
Pozisaun PD nian atu ukun no la ukun, nia hateten, nafatin fó kontribuisaun ba nasaun tuir lema ne’ebé PD iha no hanai mak “Ba Ó Timor, Maubere-oan Prontu Servi”.
“Ami prontu atu hato’o mós ami-nia hanoin kona-ba oinsá atu dezenvolve nasaun ida-ne’e. Ami prontu atur tuur hamutuk ho líder hotu iha eleisaun ida-ne’e atu haree sá programa politika no asuntu importante ba nasaun ida-ne’e. Ami prontu tuur hamutuk ho maun Xanana, maun Marí, maun Taur no líder partidu hotu atu hamutuk lori nasaun ne’e ba oin,” nia haklaken.
PLP louva PD
Entretantu, Prezidente Partidu Libertasaun Popular (PLP), Taur Matan Ruak, louva ho politika Partidu Demokratiku (PD) nian ne’ebé laiha rezerva ba Estadu maske la kaer ukun.
“Ita agradese ba PD, sira-nia kontribuisaun makaas tebes maske la tama iha plataforma Governu nian maibé sira nafatin fó apoiu ka votu a-favór ba programa no orsamentu Governu nian iha Parlamentu nasionál,” Taur hateten.
Taur dehan, kontribuisaun PD nian ne’e úniku iha Timor-Leste dalaruma mós úniku iha mundu tanba la hamutuk ukun maibé fó nafatin sira-nia votu ba programa no orsamentu ne’ebé Governu aprezenta.
“Ita halo pergunta, saida mak sira hatudu tan para ita konfia sira. ha’u hanoin foin iha istória ita Timor mak hanesan ne’e, ho nune’e ita tenke loke an,” nia dehan.
Alende ne’e, Taur mós hato’o agradesimentu agradese mós ba líder Partidu Frente Mudança hotu ne’ebé fó mós kontribuisaun makaas ba Governu iha Parlamentu Nasionál maske kadeira ida de’it.
“Agradese mós ba maluk sira iha Frente Mudança imi-nia apoiu ba Governu makaas hotu, imi sempre fó apoiu Governu iha situasaun saida de’it maske imi la tama iha plataforma, maibé imi fó imi-nia votu iha Parlamentu,” nia dehan.
Konferensia PLP nian ne’e ho tema “Hamutuk ita refleta pasadu, afirma ita-nia konsolidasaun no servisu makaas ba povu nia moris di’ak”.
Konferénsia ne’ebé hala’o durante loron ida nia laran ne’e, partisipa hosi líder partidu politika sira hosi FRETILIN, PD, Frente Mudança, KHUNTO no seluk tan, no partisipa mós hosi Prezidente Komisaun Eleissaun (CNE-sigla portugés), José Agostinho da Costa Belo no konferensista sira mai hosi territóriu nasionál.
Notísia Relevante: Partidu 24 sei konkorre iha eleisaun parlamentár 2023
Jornalista : Hortencio Sanchez
Editór : Cancio Ximenes
