Xanana Gusmão muda labarik no inan isin-rua hela iha fatin seguru
DILI, 25 fevereiru (2023)—Eis Primeiru-Ministru no Lider Rezisténsia, Kay Rala Xanana Gusmão, hamutuk ho ekipa fó nesesidade bázika hanesan foos saku 53, supermie dos 53, mina-tein jerigen 53, fugaun, sana kiik. Bikan massa, balde, kopu massa no roupa labarik sira-nian, ba vítima inséndiu Karantina Terra Santa, Tasi-Tolu.
Notísia Relevante: Deskonfia sirkuitu elétriku, ahi-han kuarentena Tasi-Tolu
Inséndiu ne’ebé kauza hosi serkuitu eletrisidade ne’ebé akontese iha kinta (23/02/23) ne’e, rezulta uma no sasán hosi xefe familia 55 ho totál abitante na’in-235 ne’e la konsege salva.
Tanba, tuir Xanana nia observasaun, hatudu armajen karreta para fatin Bombeiros nian iha Comoro ladún seguru ba vitima inan isin-rua no labarik sira hodi hela no toba ba ladún seguru, nune’e ho ekipa buka kedas fatin balun iha kapitál ne’ebé identifika seguru hodi muda sira provizoriu ba hela to’o buka solusaun ba sira-nia hela fatin.
“Ha’u haree ona inan isin-rua no labarik sira toba fatin ladun di’ak, ita bele lori apoia aihan no roupa mai, maibé sira-nia fatin toba ladún di’ak liu-liu ba labarik no inan isin-rua, no avo feto no avo mane sira tenke haree fatin di’ak ruma, muda sira provizóriu ba ne’ebá too sira-nia fatin hadi’a fali,” nia dehan.
Xefe Suku Madohi, Bernardino de Cristo Ferreira no Xefe Aldeia Terra Santa Tasi-Tolu, Esperança de Jesus, hamutuk ho vitima sira sente kontente tanba bele apoia vitima sira inklui buka fatin seguru ba labarik no inan isin-rua sira hodi hela ba.
“Obrigado ba avo Xanana nia vizita, agora fatin provizoriu mak ne’e maibé ita rasik haree katak toba fatin ladún seguru. Ami prontu koopera, nune’e ita muda sira ba fatin di’ak ruma to’o hadi’a sira-nia kondisaun hela fatin foin bele fila,” Xefe aldeia, Esperança de Jesus hateten.
Hafoin buka fatin balun iha sidade Dili, tuir planu, sábadu (25/02/23), Xanana hamutuk ho ekipa Bombeiros sei muda vítima sira fatin ne’ebé ekipa identifika.
Entratantu Xefe familia uma-kain 55 kompostu hosi ema na’in-235 hetan dezastre tanba kazu hosi inséndiu ne’ebé akontese iha kinta (23/2) maizumenus tuku 19h20 tanba deskonfia kauza hosi sirkuitu elétrika no hosi inséndiu ne’e familia uma kain 55 mak afeta ba destre ne’e.
Jornalista : Hortencio Sacehez
Editór : Cancio Ximenes
