iklan

EKONOMIA, BAUCAU, HEADLINE, MUNISÍPIU

CMCLN Baucau husu veteranu kontribui ba dezenvolvimentu

CMCLN Baucau husu veteranu kontribui ba dezenvolvimentu

Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 27 fevereiru 2023 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Baucau apela ba veteranu hotu atu kontribui ba dezenvolvimentu nasionál.

Sekretáriu Jerál CMCLN Baucau, Manuel ‘Alari’ da Costa Soares, esplika, tuir perspetiva públiku veteranu halo intervensaun no reklamasaun ba projetu tanba ne’e públiku julga veteranu sai fatór impedimentu nune’e liuhosi selebrasaun loron veteranu ne’ebé sei realiza iha loron 03 marsu sai momentu atu hadi’a-aan no kontribui ba dezenvolvimentu nasionál.

“Ita ukun-aan tinan-20 resin ona, iha buat balun la’o ladi’ak no públiku barak nia observasaun dehan veteranu sai fatór impedimentu ba projetu nune’e liuhosi selebrasaun loron veteranu ne’e hakarak halakon tiha hosi perspetiva públiku no kontribui ba projetu hotu inklui asegura to’o finál,” Sekretáriu jerál CMCLN Baucau informa ba Agência TATOLI iha Vila Antiga, segunda ne’e.

Tinan-ne’e, selebrasaun loron nasionál veteranu konsentra hotu iha kapitál Dili no laiha orsamentu aloka ba munisípiu nune’e munisípiu Baucau sei reprezenta hamutuk veteranu na’in-20 partisipa iha selebrasaun loron nasionál veteranu komposta hosi estrutura nível munisipál na’in-lima no na’in-15 seluk hosi postu administrativu neen iha munisípiu Baucau.

Sekuénsia hosi selebrasaun hanesan loron dahuluk sei realiza misa requem ba eroi pátria sira iha Jardim dos Herois Metinaro, loron daruak sei kontinua ho semináriu ho tema “Hametin Unidade ba Dezenvolvimentu Nasionál ho objetivu apela ba veteranu sira katak tempu to’o ona atu kontribui ba dezenvolvimentu no loron ikus mak serimónia hasa’e bandeira.

Alari esplika, Konsellu Veteranu nu’udar mahon ba frente tolu hanesan klandestina, diplomátiku no armada nune’e futuru membru FALINTIL-FDTL ativu bainhira reforma ona hosi vida militár automatikamente hola parte iha konsellu veteranu nu’udar membru eleitu nu’udar estrutura.

“Ema-ne’ebé la ativu ona iha forsa ne’e hanesan kombatente veteranu tenke integra-aan iha konsellu hodi kontribui, asegura ba prosesu dezenvolvimentu tomak ne’ebé hala’o,” Alari akresenta.

Veteranu tenke sai liman, ain, matan no tilun ba povu nian tatoli situasaun kondisaun povu ba governu hodi tau matan inklui kontribui ba prosesu dezenvolvimentu tomak tuir lema konsellu nian katak na’in no rin ba nasaun.

CMCLN Baucau ba futuru hamutuk ho governu sei kontinua konstrui tán jardim dos herois iha área Fatumaca hodi haloot restu mortál hosi postu administrativu tolu hanesan Vemasse, Venilale no Baucau Vila hodi halo kompleta tuir jardim herois rua seluk ne’ebé prontu ona hanesan iha Dubuwai, postu Quelicai no Daramutu, postu Laga.

Enkuantu kona-ba verifikasaun dadus veteranu tinan-2009 iha Baucau finaliza ona no kontinua ona ba iha nasionál hodi deside nune’e tuir planu sei anunsia rezultadu iha fulan-juñu no kontinua kedas ba re-verifikasaun dadus no sei taka ho rejistrasaun ikus.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!