EDTL,E.P sei distribui solar panel hamutuk unidade 1.091 ba komunidade
DILI, 27 fevereiru 2023 (TATOLI)—Eletrisidade de Timor-Leste, Empreza Públiku (EDTL,E.P) iha fulan marsu nia-laran sei distribui solar panel (tenaga surya) hamutuk 1.091 ba benefisiáriu uma-kain 1.091 iha territóriu timor laran tomak.
“Ohin ita informa ba Primeiru Ministru (PM), Taur Matan Ruak kona-ba servisu instalasaun programa Enerjia Rurál ne’ebé fornese solar panel ba komunidade rurál sira ne’ebé la asesu ba liña eletrisidade iha fulan marsu nia laran ita sei fornese solar panel 1.091 unidade ba benefisiáriu uma-kain 1.091 iha territóriu timor laran tomak, la inklui Dili,” Prezidente EDTL,E.P, Paulo da Silva, hateten ba jornalista sira iha Palásiu Governu, Dili, segunda ne’e.
Notisia relevante :EDTL, EP-Enturas halo peskiza ba fatin konstrusaun parke Solár Panél
Nia dehan, kona-ba solar panel ne’e rasik, EDTL,E.P kontrata kompañia SM Bark Unipessoal mak sosa ho nia montante orsamentu $413.617,30.
“Sasán sira ne’e, semana rua mai oin ita-nia kompañia sei ba halo instalasaun ba área sira ne’ebé sai benefisiáriu,” Paulo hateten.
Nia dehan, benfisiariu sira ne’ebé hetan solar panel ne’e ba munisípiu hotu maibe la inklui Dili. Governu planu sosa solar panel refere ba komunidade tanba haree situasaun komunidade nian ne’ebé dook hosi liña eletrisidade.
“Entaun ita fornese uluk solar panel ne’e ba ita-nia komunidade hodi fasilita iha tempu kalan,” nia hateten.
Jornalista : Arminda Fonseca
Editora : Armandina Moniz
