DILI, 27 fevereiru 2023 (TATOLI) – Diretór Nasionál Saúde Públika iha Ministériu Saúde Frederico Bosco, dehan iha fulan junu ministériu sei hahú implementa programa wolbachia iha Munisípiu Dili.
”Ita sei implementa programa Wolbachia, ne’e ita hahú uluk iha Postu Administrativu Dom Aleixo, tanba kazu dengue barak liu iha ne’eba, entaun Dom Aleixo mak sei implementa dahuluk depois ba postu administrativu sira seluk iha Dili”, Frederico Bosco dehan ba TATOLI iha nia kna’ar fatin Caicoli, ohin.
Nia hateten, implementasaun wolbachia ne’e ho objetivu atu lori susuk Aedes Aegypti husi timor nian ba Austrália hodi fó kaben tiha ho susuk Austrália nian, depois kaben to’o dala rua ka dala tolu mak mak lori fali mai Timor-Leste.
“Bainhira susuk sira ne’e kaben tiha mak lori fali mai, ita husik iha Timor-Leste, atu bele kaben fali ho susuk sira seluk iha ne’e, entaun susuk ne’e tata ema mós la hada’et ona virus dengue”, nia dehan.
Nia esplika, implementasaun wolbachia ne’e lori susuk husi Timor.Leste ba kaben ho susuk Australia nian. Maibé sei problema ho orsamentu tanba ne’e MS atu servisu ho parseiru sira atu apoiu tanba durasaun ba implementasaun wolbachia ne’e tinan rua 2023-2025.
“Ita sei buka hela dalan atu submete proposta ruma ba doadór sira hodi apoiu ita, tanba Governu rasik komprometidu, maibé espera, iha fulan juñu ita tenke implementa projetu wolbachia ida ne’e”, nia afirma.
Nia hatutan, orsamentu ba implementasaun projetu wolbachia ba tinan rua ho totál milaun $4.7
“Ita-nia parseiru iha rua mak apoiu ida mak world mosquito programme husi Austrália no ida seluk mak Menzies, entaun sira mak sei implementa projetu wolbachia ida ne’e”, nia konklui.
Jornalista : Felicidade Ximenes
Editór : Zezito Silva
