BOBONARO, 27 fevereiru 2023 (TATOLI) – Ministru Agrikultura no Peska (MAP), Pedro dos Reis, husu ba agrikultór sira iha postu administrativu Maliana, munisípiu Bobonaro atu halibur karakol ka keon ne’ebé movimenta ba mai iha natar laran hodi estraga produsaun hare kada tinan.
Ministru Pedro dehan, natar pertense iha Maliana durante ne’e hasoru problema, liuliu iha tempu agrikultór sira kuda tiha hare, sempre hetan ameasa no estrada hosi karakol, maske MAP rasik halo ona esforsu ho meiu oinoin, maibé to’o agora labele rezolve.
Notísia relevante: Agrikultór Soso Maliana hahú kuda hare faze dahuluk
“Ita iha ona hanoin, instala ona mákina, keon ne’e ninia na’an ne’e iha mós protein barak ne’ebé maka animál sira presiza haan, entaun halibur nia barak to’o nakonu hanesan ministériu hola hodi halo formulasaun ba iha pakan ernak,” nia hateten asuntu ne’e iha ámbitu inaugurasaun armazein CLN, iha postu administrativu Maliana, segunda ne’e.
MAP sei organiza no orienta ema-ne’ebé jere no halibur karakol hirak-ne’e atu habai maran hotu tiha mak halo produsaun ba ai-haan animál nian.
Tuir dadus hosi Ministériu Agrikultura no Peska (MAP) iha postu administrativu Maliana iha ektare 7,662. Hosi númeru ne’e iha tinan 2022 área kultiva 5,544 mak ativu ho nia rezultadu produsaun kada ektare tonelada haat.
Tinan ne’e rezultadu produsaun hosi agrikultór Maliana konsege hetan foos tonelada 21. Enkuantu dadus kona-bá natar Maliana mós iha 27,477 (lahan kering) ho nia produsaun 1,8 kada tonelada.
Notísia relevante: PA Bobonaro preokupa komunidade halo uma iha natar Maliana
Jornálista: Sérgio da Cruz
Editór: Evaristo Soares Martins
