DILI, 27 fevereiru (TATOLI) – Ministru Asuntu Palamentár no Komunikasaun Sosiál (MAPKOMS), Francisco Jerónimo, husu ba formandu 192 ne’ebé admitidu hodi tuir formasaun atu aproveita oportunidade hodi bele lori rezultadu ne’ebé di’ak.
“Ha’u só husu de’it ba ita-nia formandu sira atu bele aproveita tempu ho di’ak atu hetan buat ruma hosi fomasaun ne’e”, Francisco Jerónimo dehan iha nia intervensaun durante abertura formasaun ba formandu CEFTEC, tinan letivu 2023 ne’ebé hala’o iha Salaun Delta Nova, segunda ne’e.
Governante ne’e mós apresia, tanba partisipasaun iha formasaun CEFTEC makas tebes hosi feto kompara ho tinan sira liubá.
“Ha’u apresia ho envolvimentu feto iha formasaun barak liu kompara ho mane, ida ne’e hahú prome igualidade jeneru, ida ne’e hatudu mudansa, ha’u hakarak kontinua hanesan ne’e no hanesan governante ne’ebé responsavél iha área komunikasaun sosiál, ami sei tau atensaun hodi dezemvolve instituisaun ne’e ba oin di’ak liután”, nia dehan.
Iha biban ne’e, Francisco Jerónimo mós apresia ho ezisténsia CEFTEC nian ne’e kada tinan sempre hatudu nia dezemvolvimentu di’ak, maske sei falta rekursu umanus, maibé Governu sei la taka matan no sei kontinua hodi fó prioridade ba CEFTEC atu bele lori sentru formasaun ne’ebé kualidade hodi fó formasaun ba timoroan sira ne’ebé hakarak tuir formasaun hodi aumenta sira nia abilidade.
“Rekursu umanu sim, presiza aumenta tán, agora ha’u sei haree hela katak ita presiza aumenta tán rekursu umanu iha nivél formasaun”, nia adianta.
Tinan ne’e, formandu ne’ebé konkore ba iha formasaun iha Sentru Formasaun Teknolojia no Komunikasaun (CEFTEC, sigla portugés), hamutuk 272, maibé formandu hirak ne’ebé admitidu liuhosi prosesu selesaun hodi tuir formasaun iha CEFTEC hamutuk 192. No formandu sira sei tuir formasaun durante fulan ne’e.
Hosi formandu nain 192 ne’ebé admitidu tuir formasaun iha CEFTEC tinan ne’e mane iha 87 no feto iha 105.
Hosi formandu sira ne’e maioria hosi Instititisaun Estadu ne’ebé iha Timor-Leste no Estudante finalista balun.
Formandu sira ne’e sei tuir formasaun iha kada unidade ne’ebé ejiste iha CEFTEC mak unidade portugés ba jornalizmu, lian-tetun ba jornalizmu, hakerek imprensa, rádiu, televizaun, multimedia, relasaun públika no protokolu no unidade jestaun komunikasaun no krize.
Jornalista: Natalino Costa
Editór : Zezito Silva
