DILI, 27 fevereiru 2023 (TATOLI) – Ministru Finansa (MF), Rui Augusto Gomes, informa Primeiru-Ministru (PM), Taur Matan Ruak, sobre ninia viajen iha fulan-marsu bá Qatar hodi akompaña Prezidente Repúblika (PR), José Ramos Horta.
“Atualiza ba Xefe Governu katak iha viajen ne’ebé sei halo bá Qatar. Ami sei akompaña Prezidente Repúblika iha konferénsia ida ne’ebé sei ko’alia kona-ba List of Developing Countries (LDC)”, Rui Gomes hatete iha Palásiu Governu.
Iha konferénsia ne’e, Ministru Finansa sei halo intervensaun hodi ko’alia kona-ba Timor-Leste nia investimentu iha kapitál umanu, rekuperasaun hosi pandemia covid-19 no rekuperasaun ekonómika.
“Ha’u hanoin iha Estadu balun hakarak hatene ita. Ne’e mós oportunidade di’ak atu kontaktu ho governante sira hosi nasaun seluk ne’ebé gradua tiha ona sira-nia estatutu hosi LDC, saida mak sira hetan hanesan vantajen no dezvantajen sira”, nia adianta.
Delegasaun sei arranka hosi Dili iha 02 marsu no fila hikas mai país iha 10 fulan refere. Eventu iha Qatar ne’e hahú iha 04 to’o 09 marsu 2023.
Jornalista: Antónia Gusmão
Editora: Maria Auxiliadora
