OÉ-CUSSE 27 fevereiru 2023 (TATOLI) – Organizasaun Naun Governamentál (ONG) Haburas Ita Moris (HIM) fasilita formasaun hodi hasa’e koñesimentu ba Grupu Suporta Inan kona-bá redusaun kazu má-nutrisaun iha Rejiaun Administrativa Espesiál Oé-Cusse Ambeno (RAEOA).
Koordenadora ONG HIM, Pasquela Jasmi Handayani, informa, programa ne’e realiza liuhosi kooperasaun ho Ministériu Saúde (MS), hodi fasilita formasaun integradu no akonsellamentu oinsá fó-haan ba bebé no labarik ki’ik ba membru Grupu Suporta Inan atu transmite informasaun, promosaun no prátika ba komunidade iha suku 18 hodi kontribui redús kazu má-nutrisaun hahú hosi nível suku.
Responsável ONG ne’e fundamenta, programa ne’e realiza hetan apoia fundu hosi UNICEF Timor-Leste serbisu hamutuk ho Ministériu Saúde hodi harii grupu suporta inan hamutuk grupu 300 iha Oé-Cusse, hodi implementa ba komunidade sira iha suku 18 ho objetivu atu hasa’e sira-nia koñesimentu kona-bá nutrisaun ba inan isin rua no labarik.
“Alvu hosi Grupu Suporta Inan fasilita treinamentu (formasaun) kona-bá nutrisaun ba inan isin rua sira, oinsá fó susu ba labarik no mós labarik hosi idade 0 to’o to’o 59, tanba HIM hetan apoiu hosi UNICEF Timor-Leste, entaun planu ne’ebé grupu sira depois hetan formasaun, ne’e atu hala’o atividade ba komunidade sira, primeiru kona-bá matadalan investimentu ba labarik no inan nia saúde kona-bá nutrisaun iha nível suku,” Pasquela Jasmi Handayani, informa ba jornalista sira iha suku Bobokase, Oé-Cusse, segunda ne’e.
Tuir nia, kada suku realiza formasaun ne’e durante loron haat ho matéria prinsipál ba grupu suporta inan maka, maneira oinsá oferese susu ba labarik, atu kontribui hetan nutrisaun ne’e oinsá.
Nia esplika, materia prinsipál durante formasaun iha suku 18 kuaze hanesan tanba antes ne’e, fasilitadór hosi profisionál saúde na’in-30 hetan ona formasaun hosi Ministériu Saúde no Institutu Nasionál Saúde, nune’e koloka ba suku 18 kada suku ida destaka fasilitadór na’in-rua to’o na’in-tolu.
Iha biban ne’e, xefe suku Bobokase, Sebastião Cob, agradese no konsidera formasaun ne’e importante tebes hodi hodi hakbesik informasaun saúde nian ba komunidade iha suku kona-bá problema má-nutrisaun.
“Tanba durante ne’e ita haree komunidade iha baze sei menus koñesimentu kona-bá labarik sira-nia saúde, entaun ho programa ne’e bele fasilita inan sira oinsá atu hamenus má-nutrisaun ninian iha Oé-Cusse, presiza esplika ba komunidade sira atu sira mós iha koñesimentu atu kontribui,” nia katak.
Programa formasaun ne’e ONG HIM realiza iha iha suku 16, pertense ba sub-rejiaun Oésilo, Pássabe, Nítibe no Pante Makasar, hela de’it suku Lifau no Nipani mak sei realiza iha tempu badak.
Tuir dadús ne’ebé Agência Tatoli asesu liuhosi Ministériu Saúde ba Departamentu Nutrisaun tuir peskiza iha 2020 labarik tinan lima mai kraik, hamutuk 47% sofre má-nutrisaun krónika no raes badak iha Timor-Leste, nune’e mós revizaun ba peskiza ai-haan nutrisaun ne’ebé rejista má-nutrisaun aas iha Timor-Leste, iha munisipíu tolu, hanesan Ainaro 60,3%, Ermera 63,4% no Rejiaun Administrativa Espesiál Oé-Cusse Ambeno (RAEOA) 57,1%
Jornalista: Abílio Elo Nini
Editór: Evaristo Soares Martins
