DILI, 28 fevereiru 2023 (TATOLI)—Prezidente Repúblika, José Ramos Horta, hateten, maske Komisaun Nasionál Eleisaun (CNE) ho paktu ba dame ba partidu políitku sira maibé kontinua insulta malu.
“CNE halo paktu ohin duni, no ohin duni insulta malu hodi viola tiha paktu dame. Ha’u apela liu-liu mak ba membru partidu sira hotu, imi bele rona lider sira atake malu, insulta malu maibé imi nu’udar povu, nu’udar membru labele haree hodi hirus malu fali,” PR Horta hateten ba jornalista sira, bainhira partisipa iha simpóziu nasionál “Hametin Demokrásia, Pás, no Estabilidade iha konstrusaun Estadu”, iha salaun Laline Larigutu, Colmera, tersa ne’e.
Prezidente Repúblika hatutan, maske partidu polítiku sira bele insulta malu iha palku kampañia maibé membru partidu no povu keta foti ba lia hodi hirus malu iha baze, tanba dehan partidu polítiku mak halo kampañia eleitorál.
Prezidente Komisaun Nasional Eleisaun (CNE), José Agostinho da Costa Belo husu partidu polítiku sira labele insulta malu maibé tun kampaña hato’o mak planu no programa partidu nian ba povu.
“Ita-boot sira partidu polítiku tun halo kampaña haklaken programa ne’ebé mak di’ak, bazea ba diskusaun ne’ebé halo hela,” nia dehan.
Jornalista : Osoria Marques
Editór : Cancio Ximenes
