INKLUZAUN SOSIÁL, MUNISÍPIU, SAÚDE, VIQUEQUE

Governu lansa programa subsídiu bolsa da mãe ba jerasaun foun iha Viqueque

Governu lansa programa subsídiu bolsa da mãe ba jerasaun foun iha Viqueque

MSSI halo lansamentu ba programa subsídiu Bolsa da Mãe jerasaun foun ba faze daruak iha munisípiu Viqueque. Imajen/ Vitorino Lopes da Costa

VIQUEQUE, 28 Fevereiru 2023 (TATOLI)— Governu liuhusi Ministériu Solidaridade Sosiál no Inkluzaun (MSSI), tersa ne’e, halo lansamentu ba programa subsídiu Bolsa da Mãe jerasaun foun ba faze daruak iha munisípiu Viqueque.

Vise Ministra Solidaridade Sosiál no Inkluzaun (MSSI), Signi Chandrawati Verdial. Imajen/ Vitorino Lopes da Costa

“Ohin, ami abertura ofisial ba rejistu programa Bolsa da Mãe  Jerasaun foun faze daruak iha Sentru Saúde Komunitária iha Munisípiu Viqueque, inan isin-rua no labarik sira ho tinan 0-3 bele hahú ba rejistu iha postu saúde sira”, hateten Vise Ministra Solidaridade Sosiál no Inkluzaun (MSSI), Signi Chandrawati Verdial, hateten iha ámbitu lansamentu programa bolsa da mãe ba jerasaun foun, iha sentru saúde Viqueque-Vila, tersa ne’e.

Bolsa da Mãe jerasaun foun mak programa transferénsia osan husi sistema asisténsia sosiál ne’ebé kompostu ba subsídiu $15.00 kada fulan ba inan isin-rua sira durante períodu kous no $20.00 kada fulan ba labarik tinan zero to’o tinan tolu (0-3) no sei kontinua to’o labarik tinan neen (6), ho suplementu adisionál $10.00 kada fulan bainhira labarik ho moras króniku no   defisiénsia.

Programa ne’e fornese akonsellamentu kona-ba saúde husi pesoál saúde sira inklui ba kuidadu saúde durante períodu isin-rua, periódu primeira infánsia inklui imunizasaun, nesesidade hahán nutrítivu ba família no prátika ijéniku no sanitazasaun.

Nune’e, MSSI destaka ona pesoál rejistu sira  ba postu saúde hotu-hotu hodi rejista inan isin-rua no  labarik tinan tolu mai kraik iha munisípiu  liman hanesan Ainaro, Bobonaro, RAEOA, Covalima,  Liquiça, Manatuto no Covalima.

Governo lansa programa ida-ne’e ho objetivo hamenus mukit liuhusi hadi’ak nutrisaun no saúde, reduz ra’es badak no aumenta rendimentu família.

Aleinde  ne’e, família atu sosa no han hahán oioin ne’ebé saudavel, konsulta ante-natál (ANC) dala-ualu no pos-natál (PNC) dala-haat, vizita fasilidade saúde hodi hetan imunizasaun no monitoriza kreximentu.

Bolsa da Mãe  Jerasaun Foun mak programa transferénsia osan ne’ebé estabelese ho Dekretu Lei númeru 22/2021 loron 10 Novembru. Programa ne’e hahú ona iha munisípi Ainaro, Bobonaro, no RAEOA, iha tinan 2022. Sei haluan ba iha Covalima, Liquiça, Manatuto no Viqueque iha tinan 2023 no neineik ba iha territóriu tomak.

Iha fatin hanesan, Diretór Serbisu Saúde Munisípiu Viqueque, Pedro  da Silva  Ferreira, akresenta  programa ne’e iha kooperasaun ho Ministériu Saúde (MS) no MSSI hodi garante saúde públika iha Timor-Leste.

“Ha’u espera ba oin serbisu ba rejistrasaun bolsa da mãe ba jerasaun foun nian iha munisípiu Viqueque sei la’o susesu. Karik ba tereñu maka ofisiál bolsa da mae enfrenta buat ruma konsulta ho pesoal saúde sira, nune’e serbisu koordenasaun la’o nafatin ho di’ak”, nia afirma.

Iha abertura ne’e ofisial bolsa da mae jerasaun no pesoal saúde sira rejista benifísiariu  na’in tolu kompostu husi bebe ho kondisaun difisiente na’in-ida, no bebé ida  ho kondisaun normal no inan isin-rua na’in-ida

 Entretantu, Adiministradór Munisípiu Viqueque, Januario Soares “Bolly”, afirma programa bolsa da mãe hahú implementa iha tinan kotuk no daudaun kontinua implementa iha munisípiu Viqueque.

“Ha’u hanoin programa ida-ne’e ajuda inan isin-rua sira iha munisípiu Viqueque hodi hetan subsídiu sira bele hadi’a nutrisaun ba inan no oan sira nian. Nune’e ita-nia jerasaun sira tuir mai bele isin di’ak no saudavél”, nia hato’o.

Jornalista  : Vitorino Lopes da Costa
Editór         : Florencio Miranda Ximenes

iklan
iklan

Leave a Reply

iklan
error: Content is protected !!