Janeiru MS rejista 17.962 moras ISPA iha teritóriu nasionál
DILI, 28 fevereiru 2023 (TATOLI) – Diretór Nasionál Saúde Públika iha Ministériu Saúde, Frederico Bosco, dehan iha fulan janeiru, MS rejista moras Infesaun Vias Respiratóriu Aguda (ISPA) iha teritóriu nasionál hamutuk 17.962.
Nia dehan, MS rejista kazu ISPA iha teritóriu nasionál hamutuk 17.962, husi númeru ne’e afeta ba labarik ho idade menus tinan ida hamutuk 2.156, labarik tinan ida to’o tinan haat hamutuk 4.436, labarik tinan lima to’o 14 hamutuk 2.977 no tinan 15 ba leten hamutuk 8.393”, Frederico Bosco, dehan iha nia kna’ar fatin Caicoli, ohin.
Nia hateten, moras ISPA ne’e mai husi virus bateria no alerjia sira ne’ebé mak iha liuliu tempu udan bainhira udan para, rai rahun komesa hahú maka’as hodi rezulta ba moras ISPA, entaun ida ne’e nia tratamentu espesífiku mak médiku sira halo iha fasilidade saúde iha teritóriu nasionál sira.
“Moras ISPA, ita seidauk halo estudu espesífiku maibé ninia orijén ne’e iha tolu, hanesan virus bateria no alerjia, bazea ba tipu tratamentu ne’ebé ita nia médiku sira ne’ebé aplika iha fasilidade saúde durante ne’e, bainhira pasiente sira moras isin manas fó tuir aimoruk isin manas nian, to’o rekopera”, nia esplika.
Aleinde ne’e, iha janeiru MS mós rejista moras pneumonia hamutuk 2.180, husi ne’e labarik ho idade menus tinan ida ne’ebé afeta hamutuk 425, tinan ida to’o tinan haat hamutuk 621, husi labarik idade tinan lima to’o tinan 14 hamutuk 384 no tinan 15 ba leten ne’ebé mak afeta moras ne’e hamutuk 750.
Nune’e mós, MS rejista kazu diarea simples iha fasilidade saúde sira iha teritóriu nasionál ne’ebé mak rejista hamutuk 5.692 no mós diarea raan hamutuk 158 ne’ebé afeta ba labarik kiik no mós ema adultu sira.
Entertantu, MS mós rejista kazu asidente sira iha servisu fatin no mós asidente sira seluk hanesan monu motór no kareta. Hirak ne’e mai halo tratamentu iha fasilidade saúde sira iha timor laran tomak ne’ebé médiku sira fó atendimentu hamutuk 687. Nune’e mós moras kulit ne’ebé mak relata husi ita nia fasilidade saúde sira iha teritóriu nasionál hamutuk 1.183.
Jornalista : Felicidade Ximenes
Editór : Zezito Silva
