DILI, 28 fevereiru 2023 (TATOLI) – Governu Japaun liuhosi nia Embaxada iha Timor-Leste hamutuk ho Programa Dezenvolvimentu Nasaun Unida (UNDP-sigla inglés) apoiu millaun $5-resin ba Timor-Leste hodi apoia ba progarama Community Infrastructure (CIREP-sigla inglés) ho durasaun tinan lima 2023-2027.
“Projetu ida-ne’e-Projetu Infraestrutura Komunitária ba Rejiliénsia-sei foka liu ba konstrusaun iha unidade infraestrutura hamutuk 40 ne’ebé inklui sistema bee, sentina públika, ponte, sentru saúde nian hadia moru hirak ne’ebé aat ona no seluk tan, ba projetu ne’e tau osan hamutuk hosi Embaxada Japaun no UNDP”, reprejentante UNDP iha Timor-Leste, Munkhtuya Altangerel, dehan iha Caicoli, ohin.
Nia hatutan, atu hetan asesu di’ak liu ba infraestrutura komunitária, projetu ne’e sei benefisia totál uma-kain hamutuk 16,000 hosi ema hamutuk na’in 75,000 hosi númeru ne’e 47% feto iha munisípiu haat hanesan Liquica, Ermera, Bobonaro no RAEOA.
Projetu ne’e sei gasta osan hamutuk $ 5,153,665 hosi totál orsamentu ne’e Japaun tau ho montante $ 4,853,665 no UNDP apoiu $300.000.
Tuir dadus ne’ebé UNDP iha, kuaze 65% husi uma-kain sira ne’ebé la’ós kiak iha Timor-Leste iha asesu ba fasilidade saneamentu ne’ebé di’ak liu, besik metade husi ema ki’ak sira laiha.
Bazea ba dadus water, sanitation and hygiene (WASH-sigla inglés), Organizasaun Saúde Mundiál (OMS) no United Nations Children’s Fund (UNICEF-sigla inglés) iha tinan 2021 saneamentu partikularmente dezafiu tanba 43% hosi populasaun tomak laiha asesu ba saneamentu báziku no 14% husi populasaun tomak laiha bee-moos báziku, problema ida-ne’ebé aas liu (19%) ba populasaun rurál sira.
Tanba ne’e, oportunidade empregu limitadu tebes tanba setór públiku mak empregadór bo’ot sira setór privadu limitadu tebes no ekonomia la diversifikadu.
Iha fatin hanesan, Embaxadór Japaun iha Timor-Leste, Kimura Tetsuya, hateten orsamentu ne’ebé apoia ba Timor-Leste hodi realiza projetu ne’e tulun hosi povu no Governu Japaun atu hametin liután relasaun di’ak entre rai rua.
“Ida ne’e tulun hosi povu no Governu Japaun atu halo reabilitasaun ba sentru saúde ne’ebé mak kondisaun aat ona no ponte ne’ebé mak sobu hosi inundasaun sira no seluk tan, ajuda ne’e atu hametin liután ita-nia kooperasaun hanesan nasaun amigu”, embaxadór dehan.
Projetu CIREP ne’e sei implementa direta hosi UNDP iha Timor-Leste no koordena ho autoridade lokál sira iha munisípiu haat ne’ebé identifikadu.
Jornalista:Hortencio Sacehez
Editór : Zezito Silva
