COVALIMA, 28 fevereiru 2023 (TATOLI)–Prezidente Konsellu Veteranu Covalima, Osório Soares “Mausoko”, hateten Konsellu Veteranu Munisípiu Covalima hahú loke inskrisaun hodi fó oportunidade ba veteranu no martir nia oan sira atu asesu bolsa estudu iha tinan 2023.
Notísia Relevante: Governu atribui bolsa estudu ba veteranu nia oan 100-resin iha 2023
“Ha’u-nia membru na’in-rua tuir ona formasaun iha Dili, nune’e agora hahú simu ona dokumentu. Sé mak hakarak mai rejistu bele mai rejistu, maibé tenke lori valór ezame,” Osório Soares “Mausoko” hateten ba Agencia Tatoli iha nia kna’ar fatin, Tabakolot, tersa ne’e.
Bolsa estudu ba veteranu no martir nia oan sira ne’e mak hanesan, ba estudante primeiru siklu ensinu báziku, segundu no terseiru siklu ensinu báziku, ba estudante ensinu sekundáriu, ensinu superiór ka universidade Timor-Leste no bolsa estudu ensinu superiór iha rai-li’ur.
Kritéria ne’ebé kandidatu estudante veteranu no martir nia oan sita atu asesu bolsa estudu mak hanesan kartaun eleitorál, billete identidade (BI), sertidaun RDTL, deklarasaun hosi eskola no seluk tan.
Atribuisaun bolsa estudu ba veteranu nia oan sira-ne’e, bazea ba rejime atribuisaun bolsa estudu ba kombatente no martir libertasaun nasionál dekretu-lei númeru 8/2009 , 17 janeiru.
Atu asesu bolsa estudu haree ba valór, tanba Governu lakon osan ba ema-ne’ebé matenek nune’e konsellu sei haree didi’ak ema-ne’ebé atu ba eskola tanba tinan ne’e presiza ema na’in-100.
“Aleinde fó oportunidade ba ensinu superiór iha rai-laran no rai-li’ur fó tan oportunidade ba veteranu no martir nia oan atu eskola iha rai-li’ur hodi hasai S2 maibé ita sei haree lai, haree mós sira-nia valór diak ita haruka sira ba rai liur,” nia hateten.
Kandidatu bolsa estudu ba veteranu no martir nia oan hahú submete dokumentu iha loron segunda (27 favereiru 2023) no sei sei ramata iha loron tersa (28 marsu 2023).
Jornalista : Celestina Teles
Editór : Cancio Ximenes
