OÉ-CUSSE, 28 fevereiru 2023 (TATOLI) – Peskadór sira-ne’ebé hala’o atividade peska iha área Lifau, suku Costa, sub-rejiaun Pante Makasar, hanesan, Rogério Landus, Jorge Manuel da Cruz no Rojiño Cunha da Rosa, husu tulun ba Governu atu apoia sira kona-bá fasilidade peskadór nian liuliu fasilidade salva bainhira hasoru laloran no anin boot iha tasi laran.
Peskadór hato’o sira-nia sentimentu triste ne’e, tanba durante semana rua ona sira-labele hala’o atividade peska iha tasi tanba akontese anin boot, udan no laloran tasi sa’e maka’as, nune’e afeta tebes ba sira-nia rendimentu loron-loron nian.
Nune’e sira husu tulun ba Governu tanba nu’udar peskadór presiza ekipamentu garantidu ba sira hodi salva aan, durante atividade peska iha tasi laran.
“Durante tinan barak ona Governu seidauk oferese apoiu ruma ba ami, liuliu iha tempu laloran hanesan agora ne’e, presiza ekipamentu atu salva, ami husu ba Governu para tau matan mai ami ne’ebé moris ho peska, agora semana rua ona ami labele tama tanba anin boot, udan no laloran, ami la obriga maibé Governu mós hanoin ami, durante ne’e nunka tau matan ami hanesan peskadór.” Rogério Landus, hato’o nia sentimentu ne’e iha Lifau Oé-Cusse, tersa ne’e.
Iha sorin seluk, Jorge Manuel da Cruz, senti triste tanba durante semana rua la tama ba tasi tanba anin no laloran boot, só ema ne’ebé uza mákina bele tama maibé hanesan hean de’it labele.
“Tán ne’e ami husu ba Governu sei bele ajuda ami, atu hakmaan ami-nia terus ne’e, tanba semana rua ami la hetan rendimentu , ami balu asesu kréditu ne’ebé ami obriga-aan tenke mai maske hetan uitoan ka barak la problema,” nia katak.
Nia hatutan, antes ne’e kada loron bele hetan $30 to’o $40, maibé hafoin akontese dezastre naturál, anin boot no laloran, nu’udar peskadór tenke deskansa tanba durante ne’e halo operasaun ho manuál de’it.
Nia afima, durante peskadór sira seidauk hetan apoiu ruma hosi parte Governu, maske hetan beibeik ona vizita no simu promesa, maibé to’o ikus laiha rezultadu.
“Tinan barak ona, ami husu, parte Governu mai vizita haree direta ami-nia kondisaun, promete atu fó apoiu maibé nunka realiza, ami la husu barak, husu de’it redi, mákina, sei bele halo netik trompon ida iha Oé-Cusse ne’e,” nia katak.
Iha fatin hanesan, Rojiño Cunha da Rosa, uluk hosi Governu mai dala barak ona halo lista ami-nia naran dehan katak, atu fó apoiu redi, mákina, no bero maibé realidade laiha.
Nia relembra, iha tinan hirak liu ba, akontese dezastre anin boot konsege lori lakon peskador ida naran, António Meli, lakon to’o agora, ida-ne’e kauza tanba laiha ekipamentu ida atu apoia iha dezastre ne’e, tanba peskadór hotu-hotu uza manual de’it.
Nia hatutan, iha tempu akontese laloran boot, ne’e tenke deskansa, maske servisu ne’e hanesan natar no to’os, balu mai dehan labele tama.
“Ami-nia natar no to’os mak ida-ne’e, maibé Governu nunka tau matan mai ami, peskadór iha Lifau maioria suku Costa, iha suku Lifau barak hosi bairru Oémolo, hotu-hotu hanesan seidauk simu apoiu ruma, maske ita ukun an tinan 20-resin ona maibé seidauk simu apoiu ruma hosi Governu,” nia husu.
Responde, deklarasaun hirak-ne’e, Xefe Departamentu Seksaun Peska iha Diresaun Rejionál Agrikultura, Fernando Fina, ajenda ona iha planu asaun anuál oinsá hamaus ikan liuhosi rompon, nune’e planu ba 2024 sei estabelese rompon unidade 15 ba sentru atividade peskadór sira hahú hosi fronteira Sakato, sub-rejiaun Pante Makasar inklui Lifau to’o Citrana, sub-rejiaun Nítibe.
Nia hatutan, kona-bá apoia fasilidade ba peskadór, Diresaun Rejionál Agrikultura prevee ona osan ba fornesimentu ekipamentu ba peskadór sira iha territóriu Oé-Cusse, maibé depois anúnsia iha konkursu públiku laiha empreza ida atu konkore.
“Ami iha planu tanba durante ne’e ami-nia polítika ida liuhosi seksaun peska, oinsá atu lori peskadór fasil bele hetan rendimentu maibé polítika ne’e só mákina ketintin ho rompon de’it, maibé kona-bá apoiu redi ne’e ami seidauk bele tau iha planu tanba ne’e presiza orsamentu,” nia katak.
Jornalista: Abílio Elo Nini
Editór: Evaristo Soares Martins
